《合肥晚報》報道，浙大經過認真研究，終於同意金庸辭去人文學院院長一職。金庸先後喺1996同97年受聘於原杭州大學同浙江大學任名譽教授；99年，新浙大成立不久，金庸又接受邀請出任新浙大人文學院首任院長。
據官方講法，金庸年事已高，又想去劍橋大學做研究，早喺2005年已提出辭去人文學院院長職務，校方再三挽留；最近金庸再次請辭，學校尊重佢意願，改聘佢做名譽院長，授聘儀式今日舉行。金庸當年加入浙大，被指同浙大前黨委書記、新華社前副社長張浚生力撐有關，亦因此遭部份浙大學者排斥，認為佢只識寫小說冇實學。文人相輕自古皆然，金庸無必要受氣，唔做好過。