第一上海（227）由9月跌到家陣，足足跌咗50%，超賣唔在講，現價預期PE得8倍，抵到爛。第一上海07年上半年（6月底止）純利2.4億銀，狂升1.7倍，兼且超過06年度純利2.36億銀，有中期靚爆鏡佳績打底，已經冇有怕。又港股直通車雖未到站，但港股成交額上千億銀計數，第一上海下半年證券買賣、投資及股票經紀業務，肥過肥仔水。
再講，第一上海亦持有申銀萬國（218）股票，作為長期投資。證券股當中，有中資背景嘅，得第一上海同申銀，直通車一開波，兩家企業肯定有先天優勢。第一上海兼可享受來自申銀豐厚嘅股價增值，而。好保守計數，當第一上海07年下半年純利，只及上半年一半水位，全年度純利3.6億銀，預期PE都係得8倍，現價翻半番到3.12元，預期PE都係12倍咁大把。
百利保中線博翻一番
百利保（617）在8月大奇迹日時，最低見0.23元，現價0.209元，殘得交關。百利保連最近一次供股、另重秤酒店資產後，每股NAV0.65元，現價折讓高達68%。若果再秤埋集團其他物業資產，NAV折讓過硬75%。又百利保最近一次供股，連大股東在內，每股供股價0.21元，百利保喺現水位，冇人贏錢。除非香港股、樓狂牛拜拜，買百利保，「劈」埋一邊，中線冇翻一番都唔收手。
錢雋