盛產十優生嘅皇仁書院創校145年，舊生喺各行各業獨當一面，其中律政司司長黃仁龍被視為特首人選之一，噚日佢同三位同屆同學，港大法律學院助理教授張達明、景順投資總監趙小寶、建築署高級工程策劃經理薩成顯一齊出席講座懷緬當年情。
原來喺老師眼中，黃仁龍少年時代已具備律政司司長氣質，據皇仁舊生講，黃仁龍勤力又有領導才能，讀書時有個「朵」叫「幫主」，升上中六後做埋HeadPrefect。黃仁龍自爆當年一上任即刻同訓導主任開會，建議學校修訂校規，堵塞漏洞等同學仔冇得偷雞玩嘢。
寫防貪話劇攞冠軍
不過法律不外乎人情，薩成顯話自己中學時代沉迷打橋牌，經常喺校內與同學開局，但黃仁龍隻眼開隻眼閉，認真夠老友。黃仁龍做過皇仁校報《黃龍報》編輯，1982年佢發表咗篇題為《從香港主權問題談香港人的歸屬感》，文中佢對港人缺乏身份認同不無感慨，十分年少老成。
黃仁龍中文老師陸太盛讚黃仁龍中文底子好，1983年撰寫劇本《天秤》贏得ICAC防貪話劇比賽冠軍，當年話劇全港公演，好犀利。滿頭白髮嘅陸太話，香港好多叻人，但好似黃仁龍咁，又叻又對香港有心嘅就好少，佢做律政司司長最啱。