麥記好耐冇出過軍曹玩具喇，但點解係66隻？明明啱啱去完麥記見到得8隻。你有所不知，其實日本比香港快一步，總共推出了66隻，更一度出現搶購潮。只係香港市場細，返得8款咁多，即日起買套餐加$8，或者買開心樂園餐就可以得到一隻。想儲齊66隻？今次的確好難！
記者︰陸俊雄
攝影︰陳盛臣、譚盈傑
Model︰Geneieve
日本麥記Keroro登陸香港
印象中，香港麥當勞只出過一次Keroro玩具，時間是上年8月。極不幸，那次的扭蛋印章，疑引起怪病事件，曾叫家長一時間怕了Keroro玩具。不過Keroro總叫人歡樂的，今次唔同，沒有甚麼印章，是個如掌心大小的匙扣（未計星星扣環），部份角色拿着麥記食物。香港方面有8款於4周內推出，包括Keroro球星、Tamama單車手、Keroro行政人員、Giroro武士、Dororo服務員、Kululu廚神及金光別注及銀光別注版Keroro。
得8款，那麼其餘58隻從何而來？其實全數66隻軍曹兵團，最先在10月30日至11月29日期間於日本麥當勞出現。和從前的101斑點狗一樣，每隻都用密封的白色膠袋包着，純粹靠估，充滿神秘感，所以想集齊全套不容易。來到香港，不明原因只有8隻；加上改用透明膠袋包着，神秘程度大減！
邊八隻來港?
街訪：金色別注最受歡迎
雖然得8隻叫人摸不着頭腦，但當中竟然連日本方面勁搶手的金、銀版Keroro也一起來到香港，叫人更加意外。可惜，別妄想馬上就可以在麥當勞換購金或銀的別注。要等到第3和第4周即12月7日和14日，先來銀，再到金。我們更即場測試過受歡迎程度，當中金色最為叫人期待。
「梗係揀金色，其他原色個樣已經睇慣睇熟，完全冇新意。雖然有隻換上行政人員衫，又有隻扮服務員，但係同軍曹形象唔夾囉！」
「我頭先喺麥記都唔見有呢隻金色，金色搶眼過其他，唔通有別注版都唔買，揀番原色咩？」
「本來銀色都好，但我一向鍾意金色。我好鍾意佢手上有包薯條，幾時有呢隻換呀？你睇佢個頭幾似我個頭。」
「屋企大把Keroro公仔，但從未見過隻係金色。睇嚟又係男仔買嚟𠱁女仔嘅平價貨。隻銀色都好，不過隻色好似唔夠反光。」
「我好鍾意Keroro，其實好多女仔都鍾意喇！我話應該每個角色都出一隻金色，唔使好似𠵱家咁，得佢一隻孤兒仔咁。」
軍曹兵團等你攞
試問得那區區8隻又怎能滿足Fans？所以今次麥當勞聯同《蘋果》，送出66隻日本空運過來的Keroro匙扣。獨食難肥，每個Fans都想擁有，所以不設一人獨得。大家只要寄信到有關地址，就有機會獲得其中乙隻，若人數太多會以抽籤形式解決。郵寄地址：「Octagon香港鰂魚涌英皇道979號太古坊濠豐大廈13樓1302-4室」信封面寫上「領取66隻日本Keroro」及聯絡電話。