參加了一年一度舉行的帆船環島比賽，以往只要能扯起個帆，就算坐住個浴缸都可以參加，近年已少見了這些有趣畫面，不知是改了賽例還是少了有閒情逸趣的人。
從銅鑼灣避風塘出發，往筲箕灣方向駛出鯉魚門，經過石澳、赤柱、淺水灣、薄扶林再轉彎入西環、中上環，最後返回銅鑼灣衝線，參加的帆船有大有小，大的有幾十呎，由十人合力駕駛，小的則有一人駕駛的滑浪風帆。
老同學阿萊是戶外專家，上山下海樣樣都喜歡，也精通，曾要求若果出海記得預埋我，所以阿萊來電問道是否有興趣參加環島賽，本來只諗住遊船河，但鬥船又完全唔同講法，以前曾參加過鬥細船，較短途的比賽，過程一啲都唔Relax，除了要跟大自然風力搏鬥，還要付出大量體力拉扯繩索，企高擒低看風睇水，那次比賽完後，累得躺在床上兩天動不得，故此當阿萊問道是否參加環島賽事，興趣非常有，但又怕頂唔順，阿萊看透了我心意：「唔使擔心，基本上已有足夠人手控制帆船，尚餘一個吉位，話明係吉位，即係乜都唔使做，齋Hea，最多大風時幫手責吓船」，阿萊說。咁又唔同，責船係我強項，話晒有番咁上下重，天生我材必有用，一於一齊揚帆出海……（待續）