昨日講起：飛得愈高，降落傘愈大。美國、英國的行政總裁、球會領隊如果畀董事會提前中止合約，一定可以得到一大筆金錢補償，叫做「黃金降落傘」（goldenparachute），例子多到數不勝數。英格蘭球隊去年提前與艾歷臣解約，賠咗幾百萬鎊，點知蠢到會聘請艾歷臣助手麥卡倫繼任，表現仲差過艾歷臣，在歐洲國家盃外圍賽出局，於是英足總即炒麥卡倫，送上黃金降落傘，助佢退休。
英國球會領隊之中，當然有叻人，不過唔係英格蘭人啫。曼聯費格遜係蘇格蘭人，阿仙奴雲格係法國人，利物浦賓尼廸斯係西班牙人，維拉馬田奧尼爾係愛爾蘭人，車路士格蘭係以色列人，前領隊摩連奴係葡萄牙人，布力般流浪曉士係威爾斯人，愛華頓莫耶士係蘇格蘭人，數一數，英超聯前列球會領隊，只有一個係英格蘭人，就係樸茨茅夫領隊列納呢位老人家。
去年英格蘭足總想話向葡萄牙隊挖角，挪走巴西人史高拿利，點知消息曝光之後，彼此尷尬，於是各自否認，英足總搵馬田奧尼爾、麥卡倫去面試，奧尼爾只係得把口講，冇預備精彩PowerPoint，居然因此出局，足總行政總裁Barwick仲好厚面皮咁宣佈，麥卡倫係足總首選！英格蘭足總高層滿是笨蛋人物，國家隊點會好吖。
麥卡倫帶領英隊走入深谷，抵炒有餘，問題係搵邊個替他，呢次唔可以再話搵英格蘭人統領英格蘭隊嘞，賭波公司立即開出盤口，摩連奴與奧尼爾係大熱門，賠率三倍半，但摩連奴以前話過，佢想過足癮，五十幾歲先至唔教球會而教葡萄牙國家隊，奧尼爾就對統領英格蘭嘅興趣不大。意大利人卡比路已表示有興趣，應係有資格人選。
明年歐洲盃冇英格蘭隊，酒吧老闆大失所望，恐怕其他國家隊唔夠號召力，譬如英格蘭對土耳其，一定有人睇，但係俄羅斯對土耳其喎，我哋有冇精神去捱更抵夜睇直播呀？球員之中，碧咸最失望，佢下場對克羅地亞，積累九十九頂喼帽，好希望達到一百頂或以上，輸波後，佢再入選英隊嘅機會，細好多咯。