香港政府剛公佈最新一季失業率降至3.9%，係1998年5月以來新低，轉工、挖角成風，身為香港人，我求大俠都有啲開心；不過作為打工仔，最巴閉唔係搵到工，而係工搵你，奇連士文、摩連奴呢啲國際知名教練，呢排offer多到你唔信，正式皇帝女唔憂嫁。
奇哥摩佬炙手可熱
據外電報道，除咗英格蘭打晒鑼鼓搵新領隊外，愛爾蘭、澳洲、日本同南韓，仲有好幾支非洲國家隊都搵緊人，旨在搵個有名氣，又有能力嘅名帥帶隊殺入2010年世界盃決賽周。由於職位多但人才少，只要有你番咁上下料，肯定係招攬對象，唔怪得幾乎所有無帥球隊，都同摩連奴或者奇哥個名扯上關係。
亞洲隊多空缺
英格蘭領隊人工雖然好高，英鎊仲日日升，不過面對一向刻薄嘅英國傳媒，份工壓力都唔細；退而求其次，都有大把國家隊向佢哋招手，愛爾蘭剛辭退史當頓，國家隊又有空缺，不過愛爾蘭人腳一般，相信奇哥佢哋興趣不大。
亞洲就大把好世界，南韓、伊朗、澳洲都搵緊教練，日本現任教練奧禪又因中風昏迷，隨時要搵接任人，帶亞洲球隊有樣好，佢哋水平一般，如果帶到突出成績，好似軒廸克前屆帶領南韓入世界盃4強，舉國人民都當你神咁拜。巴西教練盧森保高，𠵱家就帶緊巴甲山度士，之前教皇馬就俾幾條煙玩到殘，家吓有可能話執教伊朗，以佢帶過巴西國家隊，自然鎮得住伊朗兵。澳洲足總更加主動出擊，幾位高層𠵱家身在歐洲，仲準備邀請列卡特、侯利亞及泰簡拿等執教㖭。