記者家中儲了一架食玩，全部日本貨，港人出食玩也擠不進我家架子！先別怪我崇日，我怪港人手工不巧，茶餐廳食玩個餐牌同食物的比例屬兩個世界。然而近日香港公開模型大賽總冠軍的作品，半個人咁高的灣仔綠屋，靚得教我擦亮眼睛；一個以本港風貌為題的微型情景模型，有舊灣仔街市、冰室等……件件人手製，有情懷有細節有Message，比食玩高一個層次，更超然於保育大義，雷同作品「集體」有餘「回憶」言重，都取材舊灣仔，不過各有前因非關集體回憶。香港地其實卧虎藏龍！
記者：馮冠芝
攝影：陳偉強、陳盛臣
$800起綠屋 自彈技巧少
半個人咁高的灣仔綠屋模型，於本年香港公開模型大賽勇奪3個獎項，製作者胡頌盟並沒沾沾自喜，用模型友眼光自評：「玩開模型的人，會知道件作品所花的技巧好基本，着色不像傳統模型方法咁做幾層光暗陰影，而係一塊顏色塗上去。」捨難取易，並非他技巧不及，而是模型的假假真真，複雜如人生，「我見過外國雜誌的模型，種種陰影，拍照出嚟反而有點假。」破格製法，加上在港人眼中鑲了金的「集體回憶」，他的作品不勝才怪。原以為他又會說一大串與綠屋有關的兒時回憶，他卻簡單道：「我想做低下階層的作品，IFC的模型有人會畀錢做啦！」但香港情懷，還是在作品中暗暗滲出，例如以前打風時必見的膠紙「X」窗花、露台僭建廁所等，看着令人會心微笑。
色盲製綠屋 「色謎」路人甲
胡頌盟自6歲開始玩模型，加上綠屋用基本技巧，他製作可謂得心應手，唯一難題是他雙眼，原來他有色弱，為調綠屋的綠色，發了幾次脾氣，「我明明覺得似，但個個都話唔似。最大功臣係我個細仔，隻綠色調到佢SayYes為準！我甚至周街問人幫我睇吓隻顏色對不對，有人驚咗我彈開。」聞言，我暗忖：唔怪得人呀胡生，若訪問前我在街上遇見你行過嚟問顏色，我絕對「花容」失色！除了「色謎謎」，胡生還有難題，「我想往綠屋對面的英皇集團中心的天井拍攝被拒，只好去該大廈的酒樓邊飲茶邊拍照。」所以世上無免費午餐，任憑胡生說技巧簡單，奪冠皆因他搵資料不懶散。
贏一次便收山 高調為教後生
胡生處男參賽便勇奪佳績，令人期待他繼「雷生春」、「綠屋」後，為我們重建甚麼？「模型會繼續做，但不會再參賽，太高調了！」不為贏，他居然是最老套的友誼第一比賽第二，「以前我一直躲在深山，自己砌完玩完，無位擺就砸碎佢。所以今次比賽，最大得着是識了幫模型友。」他的雷生春命途就是化成碎片，旁人為他飲恨可惜，他卻說：「我親手砸碎雷生春時，是另一種快感！」我懷疑他假惺惺，不在乎就不會四處覓地方展覽綠屋模型，他山人自有一套想法：「我想告訴這代年輕人，不一定限死玩遊戲機，我那一代人隨手拾起就是玩具。這綠屋亦然，用鐵枝、發泡膠、汽水罐作材料，製作費不過$800。模型都可以係藝術！」還望小綠屋早日覓得展地，教後生放下NDS，立地製模型。
真假大比拼
相似度：95%
有仔記酒家招牌，最唔似係個位置！模型選材範圍無有仔記招牌，胡生為美觀將其推前。
相似度：90%
鐵欄杆、天線一模一樣，唔講差點分不出誰真誰假。連圓形圍欄都跟足。
相似度：80%
考吓大家邊度扣咗20%？唔好答人同車！係進記個鐵閘，真的直閘、假的是橫閘。
灣仔街巿有救 微型展現港舊貌
現實中，綠屋被定為二級歷史建築物，灣仔街市面臨清拆，但他們的模型，卻正好相反，綠屋找不到展覽地，灣仔街市卻安放在商業大廈參展「香港本土風情」微型藝術展覽。除灣仔街市外，展覽還有和昌大押、九龍冰室、鐵皮屋等。作品全由香港微型藝術會會員製作，今次走唔甩，必定又嚟個「集體回憶」啦！但該會會長阿來，亦即負責部份灣仔街市模型，及排檔街的製作者，係就係鍾情舊時，不過係古代舊時，「我好鍾意古董，未玩微型模型前，常常在上環街一帶流連忘返。我喜歡，但又無錢據為己有，只好自己做微型版！」整吓整吓，阿來迷上整港式懷舊情景模型。「模型真實立體，是另一種保留舊式建築的方法。」
一晚整唔到10個蘋果
立體留記念，我做睇嗰個，爽得很，但製作者卻是萬千辛酸。這個1:48的灣仔街市由5人合力完成，阿來主要負責製作裏面檔位及貨品。整蔬果，粒粒皆辛苦，「切」一晚都整唔到10個小蘋果，離展覽前一星期開了4晚通宵。「我兒子成日話我不合乎成本效益，好似個金魚檔我做了幾個月，遭人抄襲，得益的是抄襲者。但製作過程再辛苦，睇到成品、眾人反應時，一切辛苦、收入不穩等負面情緒統統被蓋過！」阿來確信微型藝術是條漫長的路，堅持，因着背後的意義：「當有人稱讚我做的微型情景漂亮時，我想告訴他們，那上帝做的世界，豈非更美？」我沒有信仰，阿來用的方法卻讓我有點動容。她與胡生，教會我模型，原來可以係藝術和信仰！
真假大比拼
相似度80%
模型跟到足，招牌會着燈，只是剛巧沒電。
相似度70%
斬模型牛焉用真刀？
逝去冰室 時光倒流50年
展覽中有一個5、60年代的「銀龍咖啡冰室」模型，該冰室現址是灣仔聖雅各福群會，往日蹤影一絲不剩，製作者Rita點睇都無咁老，那舊回憶從何而來？「我爺爺嫲嫲就係冰室的老闆，我出世時冰室已執了！我是靠爸爸、姑姐的回憶及黑白照片來重現冰室。模型餐牌的價錢，跟足當年。」一間逝去的冰室，靠模型重新連繫三代，是Rita戀上微型藝術的另一驚喜。
和昌大押 「押解」工作悶氣
展場裏的和昌大押也「押」來不少欣賞目光，靚得嚟高科技，紅外線感應，一行過去模型會着燈播歌開吊扇，非常過癮。製作者Tony本身正職做樓盤模型，難怪有專業水準！但返工放工都砌模型，唔通Tony真係模型癡？「近年樓盤模型移師大陸，製作由工人做，我只負責睇圖，無得落手落腳。」一句講晒：技癢加成就感。「樓盤模型，客人睇單位座向，懶理你模型靚唔靚，有時仲好粗魯整爛晒。做大押，被人讚吓都好！」
「香港本土風情」微型藝術展覽
日期：即日至11月30日（9:00am-9:00pm）
地點：港島東太古坊德宏大廈1樓
查詢：27361399/96082476