星期三本欄話英格蘭對克羅地亞，雖有主場之利，都係買和波好啲。當日凌晨起身，睇到下半場開波冇耐，克羅地亞已經贏到二比○，不禁大叫一聲：「有冇搞錯呀，班英格蘭球員踢乜波！」點知十分鐘之內，英隊先得一球幸運十二碼，林柏特射入，跟住碧咸一腳攞命傳中，高治心口一控，右腳射入，清脆利落之至。二比二打和，雙方同時出線，左丁山收緊錢啦，點知英隊新龍門卡遜冇鬼用，俾克羅地亞後備入替球員喺二十碼外射入，而英隊啲後衞唔知去咗邊。
左丁山輸錢唔要緊，英格蘭就遇上大災難。賽前聲氣多多嘅隊長謝拉特證明咗係得個講字，完全冇風格、冇貢獻，啲後衞亂作一團，新龍門手軟腳震，衰過羅賓遜，佢地嘅整體表現，用著名球評家RobHughes嘅說法，就係overpaid，overrated，underperformed（薪酬過多，評價過高，表現不濟）。
英國《太陽報》（TheSun）話英格蘭隊在歷史上經歷不少黑暗日子，但星期三晚（英國時間，香港時間係十一月二十二日凌晨）係「最黑暗時刻」（Thedarkestmoment），領隊麥卡倫排陣錯誤，戰術錯誤，臨場冇領導才能，完全唔識臨場執生，球員如場上夢遊，慌失失，俾克羅地亞球員玩弄之時，麥卡倫做緊乜嘢，咪擔住把遮，防止雨水弄濕佢嘅寶貴頭髮囉。
麥卡倫唔係面對大場面嘅人，以色列對俄羅斯一役，關乎英格蘭命運，到咗最後十分鐘，佢走咗入廁所唔敢睇電視，直至佢嘅仔大叫大跳，佢先至敢走番出嚟。英格蘭對克羅地亞嘅最後十五分鐘，摸和就掂嘞，但麥卡倫在場邊完全冇發出最新指示或者有多幾錢肉緊，賽後仲厚面皮咁對記者講，佢準備去南非參加世界盃外圍賽抽籤，佢唔會辭職。點知半個鐘頭後，英足總高層已經取消麥卡倫張機票，知會佢執包袱，但可得二百五十萬鎊賠償，佢從此可以返英國鄉下退休享福。球迷當然激氣啦，但外國有句新口頭禪係：你飛得愈高，你把降落傘愈大。ChuckPrince,StanO'Neal離開花旗、美林，各得分手費幾億港紙，股東咪一樣勞氣！