節食時最難抵擋的美食，非蛋糕甜品莫屬，嗜甜是女生的天性，一日三餐份量可減半，甚至不吃，但不可完全戒絕甜食。近日分別有兩間過江龍甜品店踩入香港，特色是全由產地直接進口，香港冇份插手加工，統統原汁原味，台灣法式禮餅蛋糕，喬治布殊都冧的比利時得獎蛋糕，直擊全女班試食兵團試食情況，你又甘願為邊款蛋糕，增添腰間幾斤肥膏呢？
記者：盧家蕙
攝影：伍慶泉
Model：Amy、Kalo、Stella、Hidy@TheGroup
喬治布殊都係Fans
來自比利時Debailleul，創辦人MrDebailleul於95年獲世界級大獎後，銳意於甜品界大展拳腳，04年終獲得拉斯維加斯WorldPastryChampion，連美國總統喬治布殊設總統宴時也以它為御用甜品。歐美高級百貨如巴黎Lafayette有專門Counter，香港是繼日本以外，第二個亞洲地區的專門店，日本雖已有9間分店，但只出售朱古力，香港倒有幸品嚐跟比利時專門店無異的頂級糕餅，實屬難得。
主打蛋糕外，還有朱古力、餅亁、鮮果雪葩餡撻，款式多賣相靚，所有甜點皆由比利時原裝入口，全人手製造。選材嚴謹亦是賣點，如牛奶取自當地農場，以人手鮮製，還有來自開普敦的蘋果、西西里的開心果、比利時的桑莓等，食味自然大增。
Rubico$46
評分：10分
由開心果、黑朱古力及桑莓製成的慕絲，酸甜的桑莓醬中和了濃烈的可可味，帶點點開心果香，實中帶軟，口味甚有層次。
Amy：少少開心果味好特別。
Kalo：最好食，唔會太甜。
Debailleul$42
評分：9分
以創辦人名字命名的招牌蛋糕，桑莓味慕絲及餅底，比吃鮮果更香甜，外形別致，味道清甜出眾。
Amy：好似食咗好多粒桑莓咁，甜中帶酸。
Kalo：好可愛，好易入口，唔會漏。
Galloway$46
評分：7分
傳統的牛奶朱古力口味，極之香濃，味道偏甜，吃一半已甜入心。
Amy：很香滑，朱古力迷一定鍾意。
Kalo：頭幾啖唔覺好甜，食多幾啖就要飲水。
Debailleul（27353800）
地址：尖沙嘴海港城海洋中心2樓K5舖
營業時間：10:00am至9:00pm
法式包裝中式禮餅
Isabelle已有13年歷史，無論店舖裝潢、禮餅款式及包裝，統統帶有洋鬼子風格，怎料是MadeIn台灣！由於原材料來自日本及歐洲等地，其中大受歡迎的Camembert芝士餅就由法國御廚ChefM.Bruno一手包辦，所以娘味全無，反而充滿濃濃的法式風情。
蛋糕出色，款式精美、口感鬆脆的曲奇餅同樣廣受歡迎，聽說坊間的餅店會把餅的水分抽亁，以延長保存期，但食落就會硬繃繃。Isabelle則採用高水活法，既可令餅身保持香脆，不含防腐劑，食用期為3至9個月。所有糕餅均是每星期由台灣空運到港，保證新鮮。
金箔藍莓芝士餅$380/個（有金）$260/個（無金）
評分：9分！
入口極香濃幼滑，不會過甜或黏口，藍莓味甜度適中，以閃耀金箔作點綴，更顯尊貴氣派。
Stella：感覺矜貴，唔漏，芝士味好香。
Hidy：好滑，藍莓醬溝得唔錯。
CamembertCheesecakeTube$34/條
選用法國最高級的Camembert芝士製作，芝士含量高達85%，分原味、紅莓、士多啤梨、咖啡、金箔焦糖及藍莓等多款口味，條裝發售（13cm×3cm），食起來更方便。
藍莓味：10分
Stella&Hidy：試勻四條最想再食多次的口味，芝士和藍莓味好夾，唔漏。
咖啡味：8分
Hidy：未入口已聞到咖啡味，反而食唔到好濃的咖啡味，甘香啲更好。
士多啤梨味：7分
Stella：最普通，芝士味OK，但冇驚喜。
紅莓味：9分
Hidy：紅莓酸甜味幾得意，感覺好新鮮。
鳳梨酥、藍莓酥、桂花酥$5/件
乒乓波Size，以鮮果茸代替坊間常用的果醬製造，餅皮不會太厚，牛油味唔漏，餡料豐富，桂花味好搞鬼，作婚宴回禮最適合不過。
評分：9分
Hidy：桂花味最特別，吞到落喉嚨有陣清香味湧番出來，配花茶一流！
Stella：藍莓味最易入口，鳳梨味比平時食開嗰啲冇咁漏，可以一次過食到2件。
Isabelle（23590002）
地址：九龍灣MegaBox1樓45號舖
營業時間：12:00nn至9:00pm
註：禮餅及芝士餅逢星期五從台灣來貨；金箔蛋糕及禮餅須於兩星期前預訂。
試食團友
Kalo
最愛食cake，特別愛芝士蛋糕。
Amy
每次見到蛋糕都流口水，唔食唔安樂。
Hidy
飯可以唔食，甜品唔可以唔食，最愛果味蛋糕。
Stella
鍾意外形精緻的蛋糕，通常越靚越好味！
有飯開！速速試食！
為食唔係罪，有免費餐唔食就罪大惡極，本版現正招攬試食兵團，由本版記者帶團員捐窿捐罅，食盡香港九龍新界，誓要你捧住個肚返屋企。講明先，團員奉旨出鏡，奉旨見報，怕醜者免問，有興趣請填妥以下資料，寄往將軍澳郵箱65368號《蘋果日報》「試食兵團」收。記住，唔係偷食，係明請你食，唔使抹嘴。
‧必須憑報紙上的參加表格才可以參加。