文革曾自詡「政治家」，又話係「孤獨的推銷員」，橫睇掂睇，八方認為佢正職應該係「未夠班擦鞋仔」先啱。佢連任後首次北上述職，見到領導人時「偶發性語言失調症」又發作，溫總叫佢學吓新加坡，佢就懶醒話香港都要向北京、上海學習。文革曾想學北京咁污染，定係想效法上海啲貪官呢？到面聖見胡主席時，佢又叻唔切，當住胡錦濤面叫中央政治局常委習近平做「習主席」，真係𤓓到爆。
文革曾接替老董上位後染上呢個「偶發性語言失調症」，初時病徵唔明顯，只係情不自禁吹吓口哨，近期病情有加劇迹象，思想混亂倒果為因，因此連極端民主導致文革呢啲說話都講得出。醫學界對呢個病成因矇查查，政壇人士斷估佢喺北京感染，事關文革曾當年北上後開始發病。
叫習近平做「習主席」
「偶發性語言失調症」病例萬中無一，醫學文獻都唔覺有記載，相信文革曾係目前研究呢個病嘅罕有活體。從佢近期病情觀察，進入第二期嘅症狀係鍾意擦鞋，所以亂叫「習主席」（好彩佢唔係以為習近平做咗總理……）；表面睇，煲呔咁講同香港人去茶樓將企堂叫做部長嘅現象相似，實際上係反映佢係大陸官場禁忌白癡，而且顯示佢缺乏中央人脈關係，所以見高就拜，一見面就扮熟。
呢個推斷喺佢噚日到廣州見廣東省委書記張德江時得到進一步證實。文革曾話中共十七大後中央有高層人士變動，所以要喺有任何變動前先到廣州拜候張德江。政壇盛傳張德江出年上調北京做副總理，文革曾急不及待巴結，同衰多口亂嗌「習主席」同出一轍，都係想攀附新貴拉關係。
話香港佩服張書記
文革曾病發不可收拾擦唔停口，大讚張德江治下廣東經濟發展良好，又同香港合作改善空氣污染，多個深、港口岸開通，促進兩地人流往來，令粵港發展有多項突破。文革曾講到天花龍鳳，更話香港好佩服張書記。八方唔係醫生，都知道佢呢個病真係冇得救。
張德江任內被指隱瞞沙士疫情，後來率先揭發嘅《南方都市報》被秋後算賬，又因收地問題武力鎮壓太石村、汕尾，省內多宗礦難都入佢數，而香港人聞之色變嘅毒魚、東江污水、珠三角廢氣，都係因為張德江領導下，官僚一味向錢看嘅後果，年前甚至醞釀「驅張運動」暗湧，咁都值得香港佩服，睇嚟文革曾已病入膏肓。張德江應該唔知佢有病，以為文革曾明讚暗寸佢，黑口黑面話總之廣東好香港好，香港好廣東好。