又到年尾，樂壇有十大金曲頒獎禮，喺網上討論區，網友都搞咗個選舉，投票睇吓邊首金曲最能唱盡股民心聲。網友散戶揀嘅歌，只要用心聽，就會聽出唱緊股市嘅悲歡離合，好似josephleung心中嘅勁歌推介係林志美首老歌《風箏》，最窩心嗰幾句歌詞係：「今天你要記緊，理想不可太奢望，飛得太高，跌得低。」
至於阿妹張惠妹嘅《原來你甚麼都不要》，就最啱經紀聽，「就算虛榮也好，貪心也好，最怕你把沉默，當做對我的回答。」至於二人組合農夫就有首好貼市嘅歌《全民皆股》，都成為近期網友至愛。有網友就將古巨基《愛得太遲》嘅歌詞改為：「放得太遲，只差一秒身家都已變歷史。」
不過，要數經典股壇金曲，非鄺美雲嘅《再坐一會》莫屬，尤其獨白部份夭心夭肺，網友話絕對係坐艇心聲︰「再添熱茶一杯，請你多留一會，不求你回心轉意，只想別後你心中無悔。」