港股一個月累積跌幅成6000點，就連「亞洲股神」四叔都話跌得太多，𠵱家可以買嘢，不過，佢先聲明，贏輸自負，唔好賴佢。咁佢嘅睇法又可唔可靠呢？
俊樺唔係股神，梗係唔知四叔諗乜，不過，累積跌幅成6000點，短線雖然仍可能有下跌嘅空間，但開始部署買嘢，應該唔算冒進嘅做法。
不過，唔係個個人都可以買。如果你已經成手蟹貨，喺呢個位買嘢可能唔啱你，因為多數蟹民都會傾向溝貨，但係跌得深嘅股票，通常個市彈都唔會有佢份，或者升得好少，無論大市係反彈定係轉勢，最先郁嘅都係大股、指數股、實力股，四叔提到嘅股票，都係呢啲。如果你喺高位沽晒貨，或者今次跌落嚟冇乜損傷，咁樣喺23000至26000之間絕對係分批收集嘅好機會。
前日花旗股市放假，昨日㗎仔股市亦休戰，港股一個唔該反彈500幾點，成交好奀，得1048億，不過，如果昨晚花旗股市造好，港股下禮拜一應該可以再升多少少先至回落。
博升3成
長實C輪3688：長實（001）昨收132.80元，升3.1巴仙，本港進入負利率年代，博反彈要睇地產股，如果成交增加，長實可以試139元同142元，可以買啲C輪3688短炒，昨收1.90元，槓桿率7倍（有效4.1倍），對冲值0.58，正股升上142元，3688應該喺2.47元樓上，升幅有30%，正股跌穿127元止蝕。