星期二本欄寫RDA開「波」籌款，成績甚佳，有老友來電問：「究竟籌咗幾多錢啫！」當晚RDA籌募委員會主席吳嵩有講過，但唔記得有幾多錢咯。既然老友問到，於是問番吳嵩。此人一千幾隻現役馬嘅父系母系都記得，講番幾個數字，易如反掌。吳嵩話：「當晚開波，創下四項紀錄：（一）四百三十五人出席，歷年最多；（二）拍賣物品二十三件，（三）抽獎獎品三十份，刺激抽獎券銷售量，（四）全晚加加埋埋籌到二百六十一萬二千大元。」以出席人頭計，每人平均貢獻六千元，都幾犀利噃。吳嵩又澄清，當晚唔係為馬術賽籌款，而係為傷健策騎馬術隊籌款，莊偉茵係Quinceor係Quincy。
當然唔係人人出咁多錢啦，譬如拍賣名人紀念品，大馬主葉克勇就買咗四件，六千元買積尼古拉斯手套，五千元買劉翔簽名相片，一萬六千元買比利球衣，一萬元買朗尼球靴。論銀碼，黃坤就最出手闊綽嘞，以二萬一千元買阿仙奴球隊簽名球衣，再在公開拍賣搶購淑女廚神梁許安璞（公開大學校長梁智仁之太太）設計及主理嘅一圍盛宴，與施費葆奇女士鬥舉手之後，以九萬八千元贏咗。呢圍菜大有名堂，會在國泰航空廚內炮製，聽施太講：「梁太話淨係買材料已經要三萬二千蚊。」咁就啱價嘞，黃坤未在地產界發跡之前，就係著名大廚師，黃太以前係國泰航空超級空姐，黃太返國泰廚房吃新一代廚神梁太設計嘅一圍菜，好有feel啫，直情係衣錦榮歸。黃坤出價之時，相信曾經諗埋太太嗰層，做善事零舍做得開心。
梁許安璞女士呢席慈善宴，有名堂，叫做「驥躍藍天慈善宴」，菜單係蟹黃扒銀杏、炸蝦丸、燕窩鷓鴣粥、清燉獅子頭、鮑汁扣原隻花膠、金華上湯雞、紅油抄手及擔擔麵、焗西米布甸或上海桂花湯圓。菜式看似簡單，但以頂級嘅材料炮製（三萬二千元材料費），一定好食到難以形容。當晚有賓客話，買齊材料，不如交畀黃坤大廚炮製，試吓佢嘅功夫。講笑咩，黃生𠵱家揸鑊鏟嘅話，可以在股市樓市賺到億億聲，出「十」萬銀畀其他人在廚房揸鑊鏟，先至盡得divisionoflabour（分工）之精髓。