仲有一個禮拜就係立法會補選投票日，除咗兩個阿太，其他六個候選人注定陪跑，不過佢哋為有機會喺傳媒曝光沾沾自喜。創辦「港人民權民生黨」嘅律師蕭思江可能係最出位候選人，佢着長衫去報名參選已經好騎呢，原來仲有拉票絕招。
佢話自己曾出版「史詩式愛情小說」《葬花》，呢本係曠世巨著，佢寄埋畀胡、溫及陳水扁過目，八方自認孤陋寡聞，未睇過呢本書。蕭思江更話佢連續七年獲提名競逐諾貝爾文學獎，實情係由自己友文化團體推薦，得啖笑。
另一候選人柳玉成只識講普通話，因為呢個特點好多人記得佢。佢好有誠意，噚日親自將今日舉行嘅「真民主，救香港」汽車巡遊拉票採訪通知送嚟將軍澳《蘋果》，邀請我哋「跟蹤」報道。下次傳真就得，仲快。
文革曾有令要公平對待候選人，所以局長都要花時間應酬一眾攝石人，商務及經濟發展局局長肥馬下周三先後接見李永健、蔣志偉同凌尉雲，亁手淨腳。