樓市續旺，令買家瘋狂入市，新盤貨尾已經所剩無幾，𠵱家變成搶手貨，好似油塘首個大型住宅項目鯉灣天下咁，全數200餘個單位喺舊年開售，推出林林總總嘅付款優惠，同傢俬套餐吸引買家，結果都賣剩20個。
鯉灣天下睇現樓
𠵱家就矜貴得多囉，入場費330萬，想買市區一手樓嘅，可以去現樓參觀；睇完樓想感受吓聖誕氣氛，近近哋不如去九龍灣嘅MegaBox行個轉。
距離聖誕節仲有啱啱一個月，各大小商場已密鑼緊鼓，準備連串活動吸引人流，當然唔少得主角聖誕老人啦，幾乎每個場都會派佢嚟坐鎮；不過，講到最早有聖誕老人出現嘅商場，相信係MegaBox嘞，商場請到來自芬蘭聖誕村嘅真正聖誕老人，專程到場同市民見面合照，仲有機會齊齊坐上雪橇喺MegaIce滑行㖭。