鄭希怡（Yumiko）去年在東華籌款表演空中飛人，意外甩褲登上港聞版，今年她與周汶錡拍檔飛車飄移，但未開車先開火，周汶錡前晚揶揄Yumiko，揚言自己不會甩褲，不想一夜成名，難得Yumiko大方表示不介意。
法國水晶品牌Baccarat前晚在中環舉行Rock'manticParty，請來名模周汶錡、姚書軼、「翻版關之琳」Jocelyn及吳嘉龍等示範新作，還有久休復出的韓君婷及任葆琳與怕醜男友等。
自信爆棚想賽車
周汶錡戴上最貴的40多萬水晶頸鏈，以復古造型示人，她表示下周開始為東華籌款準備，她說：「我會同Yumiko一齊揸車飄移，下星期開始學車。」問公司可有為她投千萬保險？她即瞪大眼說：「咁一定係美金啦，全身計喎。」至於全身保險要買重那部份？她說：「雙腳最重要，因為好易整傷，唔係，touchwood！」
周汶錡自言18歲考車牌，車齡超過10年，所以很有信心，希望盡量為東華多籌善款，她說：「我希望將來參加成龍盃，做香港女賽車手！」談到若炒車出事，即可見報上頭條，她即暗寸拍檔Yumiko說：「吓，我唔想上A1（港聞頭條），唔想一夜成名，我諗我唔會甩褲囉！」
Yumiko強作鎮定
Yumiko昨日則在MegaBox出席電台活動，聽到周汶錡嘲諷她時，初時輕鬆叉腰地說：「係咩？咁爆笑？講乜嘢呀？」得知周汶錡聲言不會甩褲，Yumiko即不懂應對，想一想後大方說：「係呀，唔緊要啦，有啲火花幾好呀，做得公眾人物，發生過嘅事都預咗會重提，我自己個心冇事㗎喇，唔會介意任何嘢。」雖然周汶錡在Yumiko的傷口灑鹽，但她仍為對方講說話：「唔緊要，今次揸車，我哋要有默契，佢講嘢未必係針對我，揶揄我，有啲人講嘢容易俾人誤會。」
採訪：JessicaNgan、CamelLok
攝影：RickyIp、CamelLok
