恒地（012）主席李兆基自被坊間封為「亞洲股神」後，開始講股講上癮，星俠以前都提過，連超級大富豪都樂意公開炒股心得，現象可謂首見於今次港股「大時代」，以前個市幾癲都好，那些富豪只會叫你落力打工，又點會公開自己炒股賺幾多？
情況反映股海生態的確有變，任何現象再不能用舊思維去推敲，講開又講，普羅散戶真係要多謝傳媒，因現在每逢有四叔出席的場合，採訪的記者不論來自財經、港聞，甚至是娛樂，統統都承採主之命「交功課」，要求四叔對大市講多兩嘴。
似乎仍有「潛水位」
面對傳媒盛情，四叔自然心癢難耐，日前他透露已掟了10億元入市，仲話看好港交所（388）！值得留意的是，較早前所謂「股神名單」曝光時，並未見有港交所在內，事前有人話因為持股量少故未有提及。星俠推測，既然四叔以前買得少，唔知家陣又會否趁港交所在調整期時增持呢？
港交所的表現是預測大市後向的另類指標，因後市升、成交多的話，梗係有醒目仔撲入搶貨，相反若港股表現不濟，港交所當然遭人看淡。
與散戶發哥研究港交所走勢，他表示擔心該股呈現「圓頂」下跌，似乎仍有大把「潛水位」，問題係介乎157.50元個上升裂口補唔補，如果港交所不幸落到該水平，到時大市很可能已散到面目全非，仲有無散戶有心機炒股呢？