咪以為我蘋果波神淨係識賭英國波同荷蘭波！查實對日本波都有啲研究，今季日聯得番兩輪，雖則川崎前鋒冇爭標希望，但踢到仲好似搶錢咁，特別係爭緊神射手嘅祖尼奴，禮拜六迎戰廣島三箭，3.5球照要「大」。
青蛙仔鍾意紅鑽，我就鍾意前鋒，無他嘅，佢哋踢法進取，唔理對手強弱都照攻；所以睇佢哋比賽真係賞心悅目。要數佢哋陣中我最欣賞嘅球員，肯定非祖尼奴莫屬，呢個巴西前鋒喺之前兩季日職，分別幫前鋒入咗20球同16球，今季更上一層樓，29場入咗21球，𠵱家喺射手榜兩球領先飛腳嘅巴爾同天鵝嘅艾美臣，而因為佢打得咁好，聽講紅鑽仲諗住喺下季搵佢過檔㖭。
祖尼奴爭射手獎必搏
除咗祖尼奴，下半季受重用嘅北韓前鋒鄭大世亦交到功課，𠵱家喺聯賽入咗10球。前鋒有佢哋兩個，加上有中村憲剛喺中場鋪橋搭路，今迎防守力喺日職最差（同FC橫濱一樣32場失66球）嘅三箭，有力入幾粒。
同日仲有一場日聯心水，就係飛腳主場對勝利船要[-1]嘅飛腳「主勝」。若然紅鑽喺另一邊廂擊退鹿角即封王，飛腳贏波都冇用，但相信佢哋唔會理咁多，打好場波至算。勝利船近況唔差，而一對箭頭大久保嘉人同李安度蒙廸拉亦火力十足，夾埋入咗30球；不過點睇始終係飛腳較強，淨係睇佢哋喺32場入咗68球就知我冇吹水，加上有主場，冇理由贏唔到勝利船，一於要飛腳「主勝」。
撐卡城上盤掃落「葉」
英國波方面，英冠卡廸夫城有當「弗」嘅前英超射手科拿同埋哈索賓基壓陣，今迎葉士域治有力結束6場不勝，讓平/半上盤捧得過。荷甲燕豪芬有定出新教練人選落實（下季由漢堡教練史堤芬斯接手）冲喜，今訪精英隊全取3分難度，捧[-1]「客勝」。
近5場往績：輸贏輸走輸
蘋果波神
股市大旺，英超盛世，大家齊來贏多啲！