籌款節目《歡樂滿東華2007》下月8號喺將軍澳電視廣播城舉行，噚日節目司儀汪明荃、鄧梓峰、王貽興同李浩林等，加上一眾參與演出藝人鄭欣宜、官恩娜、鄭希怡（Yumiko）同鄧健泓等，齊集尖沙嘴美麗華酒店舉行記者會，李香琴突然現身，原來佢會重返無綫。
舊年喺東華節目中，Yumiko夥拍錢嘉樂表演空中飛人甩褲露T-back，件事喺觀眾心中仍歷歷在目，Yumiko就話冇留下陰影：「都過咗一年啦，今次好開心可以為善事出力，總之自己會小心。」今年Yumiko改以飛車項目上陣玩飄移，明搶錢嘉樂飯碗，Yumiko話：「咪叫佢企喺前面囉。」隨後Yumiko到電視城試車時橫掃旁邊嘅紙皮箱，技術嚇人。
肥姐擔心囡囡
鄭欣宜今次就會個人表演「歡欣火熱開心果」，欣宜話：「項目要玩火，可能拋火球之類，媽咪初時聽到都話危險㗎，但後來都好支持，因為係做善事，原本我想踩雞蛋重溫媽咪片段，但記得嗰項係台慶表演項目，唔係東華。」肥姐沈殿霞喺台慶頒獎禮亮相後，得到各界鼓勵，欣宜話：「令我好感動，都有同媽咪講要爭氣，要乖，盡快好番。」
採訪：卓寶花、卓美娟
攝影：陳俊強