鄉議局主席劉皇發成日以「鄉下佬」自居，謙稱自己唔多識嘢，但身兼全國政協嘅佢最近好巴閉，獲全國政協主席賈慶林頒發「政協優秀提案獎」，表揚佢提出嘅意見有益兼有建設性，發叔當然要飛上北京攞獎啦。
究竟發叔提咗乜嘢精闢獨到意見？佢個提案題為《關心國家穩固，增進社會和諧》，呼籲大家重視團結同道德教育。緊跟中央路線，啱晒中央領導人口味，齋睇個名已知係攞獎格。
「優秀提案獎」每屆政協頒一次，根據政協五年任期表現決定，除咗發叔，其他港區政協盧文端、汪明荃、朱樹豪、黃英豪等都有份攞獎。過去幾年全國幾千個政協總共提出成千上萬個提案，並有262項提案獲表揚。