四叔斥資逾10億元入市，但係對港股的利好效應似乎為時甚短，早市急升一段後，下午不少中資股份表現面目全非，H股指數雖然仍有130點升幅，但已由高位回落逾300點，早市高追者又一次中伏。其實四叔今年以來已經好多次開口中，早排講到明要「趁低」才吸納，聖誕後嘅兩三個月個市先至會好，其實已經中晒，呢一次根本唔使再公開講嘢，講得多會俾人話出口術。
股市難炒，轉投新股又如何？噚日中外運航運（368）掛牌不久即已插穿招股價，並以近全日低位嘅7.12元報收，較招股價低1.06元或12%，呢隻新股招股反應已算唔差，都要潛水，阿里巴巴（1688）神話，可能真係異數。
心水清嘅投資者，近期唔難察覺航運股頗見弱勢，其中噚日反彈4%嘅東方海外（316），由本月1日嘅81.50元，跌至周四最低53.50元，不知不覺已經跌咗34%，航運股嘅估值，好可能已經有變，中外航嘅穿底事件，似係行業問題多於新股氣氛問題。
反映亁散貨航運費嘅波羅的海指數兩次升上11000點新高位，最近回落但仍企於10000關樓上，如果話航運業轉淡，似乎言之尚早，不過既然行業指標之一嘅東方海外有此表現，美國經濟又話有衰退危機，航運業見頂嘅風險的確唔細。
中集較高位跌5成
其他中資航運股近期累積跌幅亦唔細，如早幾個月喪炒嘅中海集運（2866），由高位11.60元跌至噚日最低6元，勁跌近50%，同樣最近被誠哥減持嘅中國遠洋（1919），亦由高位跌咗4成，跑輸普遍中資股，航運股可能真係有頗大風險，噚日中海集運獲批發A股，冲喜作用可能都係好短癮。