隔牆有耳:九鐵末代CEO老外愛中文 - 李八方

隔牆有耳:九鐵末代CEO老外愛中文 - 李八方

仲有一個星期,九鐵呢間百年老店就成為歷史,俾地鐵合併變成香港鐵路。九鐵末代CEO詹伯樂(JamesBlake)噚日喺尖東站主持新書發佈及紀念品義賣儀式,仲為新書簽名,吸引唔少市民一早嚟排隊買書兼攞簽名。排頭位市民更企足三粒鐘,有人花咗千幾蚊掃貨,用錢買起對九鐵回憶。

新書收錄萬個員工名

八方唔執輸搵老詹簽番個名留念,估唔到佢竟然識簽自己個中文名,手字好有卡通豬「麥嘜」風格㖭!詹伯樂港英時期做官已有花名叫「尖不甩」,有九鐵員工同八方講,「尖不甩」向來鍾意簽中文名,九鐵內部文件不乏佢嘅真迹,非常鬼馬。兩鐵合併後「尖不甩」功成身退,部份九鐵員工可能好茫然,佢噚日話已盡力幫下屬爭取優厚轉職條件,相信大部份員工會滿意,佢又指兩鐵合併日之所以揀星期日,係因為乘客較少可免混亂,相信可以順利過渡。
昨日出版嘅新書《百載流芳情繫香江》,有大量九鐵珍貴圖片同資料,仲收錄咗成千上萬個全體現職員工嘅名字,可以話係貨真價實告別紀念冊,「尖不甩」喺書末總結時好大感觸:「九廣鐵路努力征戰近百年後,將不再以獨立機構的方式經營,誠然令人感慨。」

九鐵末代CEO詹伯樂噚日為九鐵新書簽名,佢個中文簽名(圖)風格似足「麥嘜」。