CookingMama2<br>加菜人形燒

CookingMama2
加菜人形燒

《CookingMama》第一集風魔萬千少女同小朋友，日日坐地鐵，身邊至少有三個人係咁揸住支筆不停攪、不停剁。最近終於推出第二集《CookingMama2:DinnerWithFriends》，今集加入咗新成員，玩埋試食兵團畀分，仲玩埋換佈景換衫。而且聯合國新菜式更加至80款，煮得好與壞都可以記錄在私人日誌，畀你日後慢慢回味。

記者：馬靜兒
攝影：陳陶鈞
Model：Debbie

今集人多勢眾

第一集只得Mama孤軍作戰，今集你大可以使用Wi-Fi連線，跟多至四人齊齊玩。即使不連線，今次都加入了很多隱藏人物，遊戲最初只有阿媽同阿囡，每完成一道菜式，就會逐個加入唔同的小朋友。每個成員煮的菜式都會有分別，越玩就會越發現人多勢眾。
論遊戲內容，第二集的確豐富得多，除了有新廚師加入，更新加入試食兵團，試食完會畀分數。能在指定時間內完成，又煮得好就會有星星，儲夠五粒星，就會獎你禮物，禮物可能是一隻匙羮，也可能是一隻碟，甚至是一棵聖誕樹。

■第二集多了Wi-Fi連線，可以跟最多四個人一齊玩。

■不斷煮就會有不同的隱藏新成員加入。

■煮完每道菜都有試食兵團畀分，五星為滿分。

■高分可以揀禮物，禮物可能是一隻匙羮。

■83分算高分咯。

日日換衫換煮具

女仔平日都愛天天換新裝返工，Mama都唔例外，今集就可以自己揀圍裙（其實都只是揀顏色），連砂煲、刀、砧板、廚櫃、窗框等都有得揀。最好笑是可以揀埋窗外的景色，甚至連抽屜的手掣都有得揀！你大可藉此創出屬於你個人風格的廚房。

■廚房的廚櫃、抽屜Lock和窗框都可以轉換。

■揀不同的圍裙。

■揀不同的鍋。

80國聯合菜式

上集煮的大都是日式西餐，今集就增加了很多不同地方的菜式：包括蒸魚、甜品、飲品，連土耳其的烤肉和法式甜品都有，總共80個國家的食譜，150個不同的MiniGame。
最得意都算是自製人形燒，自己開麵粉、搓皮、塗蛋漿等，真的幾過癮！整泡菜就繁複一點，切完又要加鹽，又要切葱切蒜頭，切完又要塗上菜葉，再用石頭壓住，但都算幾好玩。