中、美暗戰，北京一時一樣，搞到美國小鷹號艦隊嚟到香港過門不入，8,000官兵以為可上岸過感恩節，點知失望而回。根據紀錄，每名美軍平均喺香港使5,000蚊，灣仔酒吧、食肆、商舖冇咗4,000萬生意，今次唔知怨邊個，美軍親友更加㷫，喺網上大鬧中國，好勞氣。
一名自稱「MadMonofUSSKHSailor」網民稱，好多官兵親人花好多錢遠道嚟到香港，以為可一家團聚，中國卻阻頭阻勢，佢話第日中方要求參觀美軍戰艦或到訪美國，美國應該拒絕，還以顏色。
另一網民更指中國輸出好多有毒玩具、唔合規格產品去美國，美國人都唔計較，照樣買中國貨，中國竟然咁對美軍，真係離譜兼蠢到死，佢呼籲同胞杯葛中國貨，「一件都唔好買！」