林苑入行以來與側田的緋聞傳不停，最近二人更多次被拍到約會，林苑強調跟側田只屬朋友關係，絕對不會因為外間的閒言閒語失去這位好友，可見二人關係十分牢固。
林苑最近兩個月一直留在北京錄新碟，日前返港宣傳《野。良犬》，甫回港即連續兩天被影到與側田約會，但她仍堅稱大家只是好朋友，目前她仍是單身。
「行街有錯咩？」
林苑日前接受訪問時說：「有人追，但唔啱囉，我同張敬軒、側田都係好朋友，冇火花，冇就係冇，就算明知會俾人寫都唔緊要，冇可能為咗新聞搞到冇朋友，我同側田都正大光明，出街都係每個人會做嘅事，我係知道會有狗仔隊跟住影相，但我只想做番自己，行街有錯咩？我唔理，咁做人好辛苦，我喺圈入面冇乜朋友，我唔會因為啲新聞放棄佢哋。」
問林苑會否擔心緋聞影響側田，她說：「如果有一日我朋友同我講，話唔可以一齊出街，我會understand，但我信我同佢嘅公司都唔係咁嘅人，而且咁耐以嚟都冇人打過嚟鬧我，行吓商場啫，又唔係開房，有乜咁大件事呢？假如有一日佢遇到個好女仔，我會戥佢開心，相反佢亦會戥我高興。」
拒再拍笑片
談及工作，林苑在《野》片演殺手經常要單手持沉重的長槍奔跑，雖苦但她甚有滿足感，從入行當歌手，再接演笑片，林苑說：「我唔想再拍笑片，我都唔理解港式笑話，自己唔識笑點叫人笑？我只想演有火花有戲做嘅角色。」
採訪：魯萍
攝影：陳偉權
化妝：KeiKei
髮型：Chin-G
服裝：I.T
場地：FiammaPub&Bar
