夢工場3D動畫片《蜜蜂電影》（BeeMovie）前晚喺圓方舉行首映禮，導演史提夫希拿（SteveHickner）同為戲中主角蜜蜂仔Barry配音嘅荷李活笑匠謝利宋飛（JerrySeinfeld）前晚都有到場。
名人雲集
咪睇宋飛雖然唔係賣靚仔，仍然有好多fans喺現場支持，仲有唔少藝人如倪震、谷德昭、黃宗澤、湯盈盈及無綫高層陳志雲等出現，個個都十足小fans一樣等偶像。電影內有兩隻蜜蜂角色嘅容貌跟谷德昭同肥姐沈殿霞似到十足十，難怪谷德昭見到宋飛都即刻上前攞簽名啦，唔知宋飛認唔認得呢個同片拍檔呢？
宋飛一嚟到首映現場即忙於接受電視台訪問，司儀彭晴問佢拍攝過程，佢就以英文話：「好喜歡戲中蜜蜂的角色，因為跟我一樣很勤力。」首映禮一向有嘅儀式係舞龍點睛，不過前晚電影公司就大玩新意思，改舞蜜蜂兼放蜜糖入口，完全符合主題。不過主角宋飛只係喺現場逗留咗好短時間，就要即刻趕搭夜機返美國，而冇入場睇戲。
