英軍出局，心碎球迷齊齊在《拉闊足球場》哭波喪，呢班夜晚唔瞓捧英格蘭場嘅fans認為輸錢事小，最慘係見到愛隊出醜人前。一如所料，冇人同情麥卡倫之餘，大家更怒斥呢個「廢柴」排陣用人都有問題，賽後被炒根本係咎由自取。
藍鑽石今集提供
星期六13紐卡素1:1利物浦（6.5倍）
星期六22保頓1:3曼聯（10.5倍）
星期六23愛華頓2:1新特蘭（7.5倍）
唔捧利物浦 生活幾難好
起底：一打入嚟就挑釁藍鑽石的Ringo，全因佢支持利記，與AC米蘭躉藍鑽石勢不兩立。兩人舌劍唇槍，Ringo力捧利記今次贏梗；至於藍鑽石就寸紅軍歐聯都未搞掂，今輪英超怕且都唔敢去盡。
M：Mike B：藍鑽石 R：Ringo
M：下一位讀者場場利物浦比賽都睇，事關佢係瘋狂利記迷。
B：啱晒，我係AC躉，即管放馬過嚟！
R：你今次冇運行啦，AC逢係歐聯前戰績都嚇死你啦！
B：不過AC差唔多出咗線喇，你隊利物浦顧掂自己先啦。
R：我見你今次揀咗紐記和波波膽，假如你想要生活好，今次一定要揀利物浦。
M：不過謝拉特踢咗咁多場，輸畀克羅地亞後又頹晒，對利物浦影響好大噃。
R：我又唔擔心，記得上一次利記對富咸，全場一路都咁積極，最後末段連入兩球；我相信紅軍今場都會咁樣踢，會盡量喺在上半場解決對手。
B：但係利記咁多國腳踢完國際賽，而且高治、謝拉特同懷斯等所屬國家隊通通出唔到線，點都有啲影響。
R：唔驚，唔好唔記得利記近6次對賽，有4次贏；而且奧雲仔唔出得，邊個幫紐記入波？
M：我都撐你，Ringo，事關紐卡素前線係勁，不過中場好亂，好難夠利記砌。
R：係呀，利物浦中場一定搶晒啦。我相信佢哋會早啲發力，希望盡早解決對手。
M：非常合理，利記始終有歐聯後顧，為免夜長夢多，一早會盡早入波，可能買個「半勝」仲好。
Ringo貼士
星期六13紐卡素0:2利物浦（7倍）
星期六22保頓0:2曼聯（6.5倍）
星期六23愛華頓2:0新特蘭（7倍）
藍鑽石點睇：利記有後顧寧捧和
利物浦不少球員打完國際賽，而且多數出局而回，下個禮拜歐聯對波圖又不容有失，咁多不利因素，唔係咁值得睇好，博和波較合理。
其他讀者精采對話
點會出個??仔把關
Mike：藍鑽石話英格蘭咎由自取，你點睇呀？
KK：的確係攞嚟衰。咁重要嘅比賽，經驗優於一切，唔應該出個𡃁仔把關，而且唔出碧咸，變陣踢4-5-1亦有問題，用番4-4-2會好啲！
藍鑽石：所以抵死呀，麥卡倫俾人炒。
KK：麥卡倫亦太過保守，追和2:2之後，猛叫啲球員：「Getback！Getback！」當時仲有接近20分鐘，點守得完呀，結果咪累人累物囉！
望奇連士文救英軍
阿樂：噚晚真係瞓唔着！我捧咗英格蘭成廿年，見到佢咁樣出唔到線，真係好傷心！追到2:2之時，我真係以為佢哋出到線。
藍鑽石：醒吓啦，阿樂。你聽我講，英格蘭咁多年令人失望多過開心，唔好捧呢隊波喇！
阿樂：我一世都係捧英格蘭㗎啦！愛之深責之切，希望英格蘭喺3年後世盃會有好表現。我亦希望奇連士文、摩連奴教英格蘭，點都好過麥卡倫。
和波就要買「雙」
藍鑽石：噚晚有冇買波呀？
Alan：買咗個和波，英格蘭呢場點睇都應該和㗎，最後輸波，只可以怪自己唔爭氣同個領隊廢。
Mike：今個禮拜有咩心水呀？
Alan：唔使理咁多，總之和波就買「雙」，我上次就中歐聯8串1。
Mike：和波等於「雙」，呢個就小學生都知啦，咁你最後贏咗幾錢呀？
Alan：買咗50蚊條，收番6,500蚊，以小博大都幾好。
巴甲中游隊對碰必「大」
Mike：我知你除咗英冠英甲，對巴甲都有涉獵。
金水：巴甲通常有幾隊幾好賭，好似中游嘅紐廸高、帕拉尼恩斯、費古倫斯等，佢哋入得亦都失得，兩軍對碰嘅時候最好就買「總入球」同「大」。
Mike：今輪英超你又有乜心水？
金水：新特蘭英超作客未贏過，愛華頓主場只係輸過畀曼聯同利物浦，我認為呢場拖肥糖贏梗，敲小勝2:0。
講波有得Fun
參加即贏豐富獎品
只要透過WebCam參加《拉闊足球場》．即可贏取KFC$100現金券及《英超星光15載》紀念冊一本。
有興趣參加？即上 http://soccer.atnext.com/jp/soccer
下次舉行日期：29/11（下周四）8:00-8:40pm約定你
