有線旗下SundreamMusic力捧的Zoie譚凱琪，廚藝精湛，不過Zoie絕不隨便出招。拍拖時只會為男友煮即食麵，反而一星期煲四次湯煮五人大餐饗家人。大抵只有愛情路上的MrRight才能迫使Zoie露兩手，但名單上，丁子高肯定冇份。
相約譚凱琪（Zoie）學烹飪，分別是酥皮海鮮撻和心太軟，趁當事人甜在心頭，把握機會追問她與丁子高的一段情。Zoie淡淡地說：「已經過咗去，要回應嘅都回應咗。」她表示該篇訪問很多都不是事實，報道一出，登時令她「打個突」，還哭了起來﹕「我𠵱家唔敢再去講任何嘢，總之識我嘅人會知道囉，清者自清。」
打電話學煮餸
問Zoie是否真如報道所言為了苦戀丁子高以致情緒抑鬱，她沉吟半晌才說﹕「開心唔開心每段感情梗係會有，但咁啱嗰段時間冇拍拖，工作又唔係咁順利，屋企又發生咗啲事，令我崩潰成日失眠。」自從脫離小室哲哉後，Zoie一直是自由身，冇工開，惟有望天打卦：「其實呢段時間我都有做其他嘢，可能係唔識平衡自己啦！不過𠵱家所有問題已經解決晒。」
沒有工開的日子，Zoie也不寂寞，就是下廚當消遣，難怪有線找她主持飲食節目《活得很滋味》，她笑道：「喺日本嗰陣，一諗起想煮乜嘢餸，就打畀媽咪問，遙距學煮。我係買電話卡，但一個月都要成1,000蚊，呢餐飯真係幾貴！」
有人追怕負責
Zoie除了懂得燒菜，還有愛心靚湯，而且無湯不歡，她笑道﹕「我一個禮拜會煲三、四次湯，喺日本嗰陣我都成日煲湯。」
問她男友可曾試過其精湛廚藝？Zoie就話﹕「即食麵算唔算？」相比之下，家人有口福得多，Zoie試過煮五人大餐，有花膠雞湯、蒸肉餅和最拿手的醬爆豆豉雞，她說：「佢哋食完之後都話覺得我嫁得出呀！仲戥我開心㖭！」
刻下Zoie還準備學煮法國菜，為嫁人鋪路，如今主持飲食節目，已學會整六款蛋糕。中西合璧，理應天下無敵，但她還沒想過再拍拖：「追求者嘛，都有少少嘅，不過發展一段感情係要負責任嘅，我又成日唔喺香港，我唔想成日唔喺佢身邊。」
採訪：吳佩思 攝影：仇志德
場地：Eutoposshowroom&cafe
