【北京直擊】王家衛同董潔噚日喺北京宣傳電影《藍莓之夜》（MyBlueberryNights），電影公司安排咗10名內地少女參加藍莓巴士尋夢之旅，稍後呢班女仔會坐巴士遊遍內地多個城市做宣傳，直至下月20日返回上海，出席《藍》片嘅內地舉行嘅首映禮。
尊重演員
荷李活影星祖廸羅（JudeLaw）同NorahJones喺《藍》片裏面有親熱鏡頭，拍攝時，王家衛有別荷李活其他大導，破格畀演員投票決定，大家都贊成呢個安排好有新意，又好尊重演員。
王家衛表示手上正籌備梁朝偉主演嘅新片《一代宗師》同妮歌潔曼（NicoleKidman）主演嘅《LadyfromShanghai》，對於妮歌潔曼曾講笑話希望新片喺佢屋企附近拍，王家衛回應：「梗係唔會，部戲一定會喺上海拍。」王家衛話唔會同時開拍兩部戲，明年先開一部，另一部等09年先拍。
榮升博士
香港大學稍後會頒發社會科學系榮譽博士畀王家衛，佢都已經接到通知，佢話：「我好支持電影，遲啲都會喺香港大學搞講座，香港𠵱家正缺乏製片同編劇。」