呢幾日音樂充滿我嘅生活。前幾日去聽林憶蓮演唱會，唱得超好（演唱會應該音樂最重要，又唔係馬戲班，唔使又爆破又煙花嘅，係咪？）上個星期二路經太古坊糖廠街露天廣場，卻無意中欣賞到精采嘅音樂會。
嗰日放工好攰，行行吓聽到德伏扎克E大調弦樂小夜曲，好輕快，原來係音樂會，搵個位坐低，一聽就個幾鐘，之後成個人精神晒。表演嘅原來係本地典堂級嘅香港管弦樂團。
戶外演奏需更專注
港樂原來同太古港島東合作，11月20日至12月11日逢周二演出共四場，分別由音樂家夏定忠、鄒翔指揮；夏先生話同以往喺演奏廳舉行嘅唔同，喺繁忙戶外演奏需要更加專注，亦要更熟練嘅技巧。聽眾仲會有詳解演奏樂章嘅小冊子，每場表演結束後仲有與音樂家交流環節。
我幫大家問太古港島東攞咗20隻由港樂製作嘅CD，樂曲包括莫扎特《木星交響曲》、貝多芬《英雄交響曲》、劉天華嘅《良宵》、柴可夫斯基《1812年》序曲；有興趣嘅電郵去mailto:[email protected]登記，註明「拿取香港管弦樂團免費CD」，先到先得。
逢周一至周四刊出