98年先經歷母親離世、再到今年父親因老人病仙遊，加上跟鄭秀文分手、得「最受歡迎男歌星」獎後事業下滑，許志安近10年遇到的事特別多，差一點要睇心理醫生求救。但經一事長一智！
安仔學懂人生要隨心所欲，學習了父親順變的性格、習慣了跟Sammi關係由情侶變知己，再加盟新唱片公司，似乎各方面都準備起飛。
當小眾覺得許志安每次宣傳都例必提鄭秀文（Sammi），出動「感情牌」這招宣傳伎倆，莫理他孰真孰假，Sammi確是安仔心目中最重要的女人之一，地位僅次於母親。
不需講太多
談到心中的重要女人時，安仔說：「第一位係媽咪，佢對我好重要，我乜嘢都同佢講，冇佢冇我。Sammi係第二位，大家都一齊咗咁耐，有默契。好似爸爸件事上面，大家睇到唔需要我講太多。我哋不時會打畀對方，吹吓水，有時喺工作上又會畀意見。𠵱家知己嘅關係好舒服，舒服過以前，唔會諗出賣呢啲嘢，係絕對信任嗰隻。第三就一定係師傅梅艷芳，佢係我事業上嘅伯樂。不過𠵱家有兩個女人唔喺度喇！喊好笑好，我會喺心入面同佢哋講。」
至於沒有上榜的韓紅和助手細佬，安仔謂：「韓紅係契妹，佢好爽直，大家肝膽相照。細佬係全心全意嘅好助手，合作咗十幾年，真係搵都搵唔番。」
安仔在剛推出的唱片，林夕填的其中一首《空前絕後》，希望他能忘記過去，就算過去是最愛的，但還是要展望將來。
「唔開心梗有」
剛經歷了父親過身的安仔，表示現在學懂了順變，他說：「林夕講得啱，正如爸爸移民之後，佢話哀不要節，但要順變。一切隨遇而安，唔開心唔捨得梗有㗎！然後我先諗起，以前我真係睇唔透。」
人生起跌確是難料，正如02年奪「最受歡迎男歌星」後，不能乘風而上。是運滯還是未到適當時候得獎呢？安仔說：「人生好似條curve，總有高低潮，低潮已經過去，同Paco合作嗰10年最勁，02、03年開始回落，但𠵱家又開始好過之前，當年我攞獎，全部人起身為我拍掌，我已經好開心。」
採訪：王連連
攝影：葉君海
髮型：CliffChan
化妝：MaggieLee
場地提供：TrattoriaNobilduca
