星期日（十一月十八）掛住睇波不知天日，朝早畀老婆提醒：「要去投票呀！」先至記得要為區議會選舉投票。於是中午飲茶前行到去投票站，站內只有一位阿婆搵緊身份證，職員叫左丁山唔使排隊等阿婆咯，可以攞選票先，投票過程由頭到尾唔使三分鐘，出到嚟都見唔到有人行入去投票站，情況真係幾冷清。選區議員雖然唔係甚麼大事，但區議員畢竟係為地區服務之人，我哋係應該踴躍投票嘅，至於投票畀邊位，各人意見不同，唔須要講。
今次區議會選舉投票率只有38%，比○三年少咗六個百分點，令人失望。雖然話投票市民超過一百一十萬，人數破紀錄啫，但有六成二選民選擇唔投票，顯見區議會選舉不受重視。
靚女J話佢唔得閒去投票，咁星期日去咗邊度呀？靚女J話：「我去會展中心聽靚仔股神陸東講股，場內有成三千人，陸東一個人唱獨腳戲，佢人靚仔，大把身家，測市又叻，話明股市跌四千點，個市就跌四千點，幾多師奶對佢嗒晒糖呀！」睇嚟靚女J都為陸東暈晒浪，既然暈暈地，邊度記得去投票吖，佢連自己選區有乜嘢人競選，邊位係現任區議員都唔知呀。陸東就夠巴閉，可惜僱主瑞銀就唔爭氣，揸住唔少與次按有關嘅抵押債券，撥備之後又繼續撥備，搞到盤業績夠晒曳。分析師W話啲國際大行嘅股價仲未見底，但公司招牌有價值，不妨有啲耐性，等啲新CEO上台大清洗，狠狠地再來一次撥備撇賬之後（即係大概○八年第一季），就可以買入呢類股份，中期持有。
大凡新CEO上台，必然為咗自己利益，與上任嘅政策一刀兩斷，為公司洗太平地，不惜蝕大本，總之可以賴晒上任庸碌無能、冇眼光。花旗集團嘅股價已經跌得相當殘，到時可以吼實。聽完分析師W之言，區議會選舉結果已經出晒嚟，民建聯大勝，泛民主派大敗，只有公民黨初試啼聲取得八席，叫做有交代。選舉結果其中有何微言大義，要慢慢研究。