ILoveYouBoyz由電台殺入電視台，吸納多一班fans，二人下月會舉行5場舞台劇，希望今年有多些環節與觀眾互動，他們更表示利用禮物攻勢吸引人買飛，希望在聖誕檔期殺出重圍。
組合ILoveYouBoyz（艾粒）於下月21日至25日在理工綜藝館舉行「ILoveYouBoyzGaGameShow鬆啲!衣池瀨」，今次是艾粒第4次搞舞台劇，二人希望今年有多些環節與觀眾互動，所以他們已經構思好除了會捉觀眾上台玩遊戲之外，更會邀請一名得獎觀眾整晚坐於台上近距離欣賞他們演出。
Donald說：「我哋唔想啲觀眾淨係坐喺台下睇、坐喺度笑，如果佢哋可以上台玩埋一份，氣氛一定好好多。而且今年肯上台玩嘅觀眾一定大豐收呀，總之邊個上嚟都有大禮物。」
另外，少爺占透露已聯絡不同的供應商，所有買飛的觀眾於入場前都可以得到聖誕福袋一個，他笑說：「其實我哋喺聖誕呢啲檔期搞騷，真係搵命搏㗎，你知好多人會去旅行同埋去睇其他巨星嘅騷，於是我哋就用禮物攻勢嚟吸引人買飛，保證個福袋都令你回本呀。」
三爛gag王助陣
艾粒為了迎合觀眾口味，二人日前到旺角進行街訪，分別有啦啦隊、鋼管舞及白雪公主三個環節供途人選擇，最多人選擇的一個將會搬上舞台，結果最多市民選擇鋼管舞。
嘉賓方面，阿占表示已落實的包括古巨基、孫耀威及張敬軒，原來三人都有一個共同點，他說：「佢哋三個都係爛gag王，我發覺觀眾都係最鍾意聽我哋兩個講埋啲無聊笑話，於是我哋就請咗三個專講爛gag好叻嘅歌手嚟撐場。」最後Donald表示考慮加入一個英文環節，因為有不少外籍家庭傭工看了《阿笨與阿占》後成為他們的fans。
採訪：李珮洳 攝影：陳慧安
化妝：Khaki＠MaeVonMakeup
