鄭欣宜日前接受商台節目嘅錄音訪問，佢喺節目度話自己係個好鍾意講嘢同開玩笑嘅人，但係做嘢時就會相當認真，又話雖然傳媒成日覺得佢自信心爆棚，但實情佢就欠缺自信心。至於身為名人之後，佢就話從來都冇埋怨過，亦都冇話唔希望媽咪沈殿霞係圈中人，佢話：「發生每件事都有原因，之前嘅負面新聞只會令我更堅強，同埋更加接受自己同做好自己。」