補選大戰殺到埋身，兩太不敢鬆懈全力拉票，佢哋個女亦日夜陪伴媽媽，陳太個女慘被拖落政治抹黑渾水，葉劉較好彩，乖女冇受牽連。葉劉同愛女相依為命，所以囡囡葉榮欣（Cynthia）專程返港助選，令佢心情大好鬥志更旺盛。為爭取同囡囡見面時間，兩母女近日頻頻孖咇上陣，噚日佢哋去石硤尾同一班單親家庭父母分享單親人士苦樂，表現溫馨。
Cynthia之前講過唔會畀追求媽咪嘅人得逞，不過葉劉助選團近日卻傳出一單有趣緋聞，令緊張選情添加一點浪漫色彩。葉劉選舉大過天，梗係放下兒女私情，緋聞主角係Cynthia！今年18歲嘅Cynthia，有人追或有男朋友好正常，大家最關心嘅係誰是男主角，八方聽聞係葉劉愛將、匯賢智庫政策發展總監陳岳鵬（Ronald）。
記者面前大讚Ronald
Ronald年僅25歲，啱啱當選南區薄扶林區議員，之前Cynthia都有跟媽咪落區幫佢拉票，兩人喺美國時已認識，Cynthia更向記者大讚Ronald工作認真、勤力，睇嚟佢同媽咪都好有眼光，十分欣賞呢個政壇明日之星。據知Ronald係有家底之人，平時鍾意跑步、游水同喺沙灘晒太陽睇書，又係牛津划艇隊員，仲識吹笛，真係動靜皆宜、能文能武。
八方問Ronald，究竟佢同Cynthia有冇可能，佢反應好大咁話估唔到越傳越勁，之後好鄭重咁話，「真係冇啲咁既事。」咁佢點睇Cynthia呢？佢好「行」咁話，自己似係個大哥哥，因為Cynthia細佢7年，而且只係個中學生，邊會撻着？佢睇嚟真係好錫住Cynthia，希望大家放佢一馬，唔好亂咁傳呢啲緋聞。
男主角：專注工作
初入政壇，Ronald話𠵱家首要專注區議會工作，正考慮設立網上議員辦公室，其他嘢暫時唔諗咁多住。呢對緋聞男女似乎心有靈犀，Cynthia噚日同單親家庭玩遊戲時，話𠵱家最想係順利升讀大學，因為媽咪好想佢學有所成，唔可以辜負媽咪期望。葉劉應該都唔想個女咁快拍拖，因為女兒係佢傾訴心事對象，唔開心時會同個女呻吓，佢又話後日係丈夫逝世10周年日子，當日會暫停一切競選活動，同乖女及親友一齊靜靜悼念丈夫。