恒隆地產主席陳啓宗早前指前綫卿姐喺港大演講時派選舉傳單，將大學政治化做法唔妥，卿姐嚴正否認，發出公開信反駁陳啓宗，要求對方道歉。陳啓宗噚日回覆卿姐，唔係求和，而係堅稱冇講錯嘢，更邀請卿姐去港大擺擂台，喺師生面前公開對質，辯個明白。
建議擺擂台對質
陳啓宗係億萬富豪，梗係唔會輕易就範認錯，不過佢仍然攞唔出指控卿姐嘅證據。如果陳啓宗真係有證有據，八方呼籲佢立即公諸於世，唔使等到擺擂台，即刻踢爆卿姐老作，陳啓宗愛國愛黨，打擊「吹水政客」唔使手軟，更加唔使客氣喎！
卿姐牙尖嘴利，亦好口硬咁話未驚過，聲言奉陪到底，只要港大肯提供埸地，夾啱時間隨時可以應戰，歡迎傳媒錄影錄音，費事有人講完又唔認數。卿姐話回歸前都試過舌戰陳啓宗，當年接受某瑞士電視台訪問，兩人就香港前途問題激辯，佢話記得陳啓宗十分勇猛，雙方爭持不下，場面好火爆。事隔10年，兩個人都老咗10歲，但火氣睇嚟有增冇減，呢場火爆富豪隻揪政壇惡女世紀好戲，相信精采過補選論壇。