西班牙「王子」魯爾唔經唔覺都「3張嘢」，今季忽然狀態回升，原因眾說紛紜。有人話，國家隊主帥阿拉干尼斯請食閉門羮，令佢化悲憤為力量；有人話，戒指年前開光，力量隨即而至；有人話，屋企4條「化骨龍」係佢發奮誘因。「魯」當益壯謎底日前揭盅：「重力室」？
每日置身「高原」８小時
「王子」魯爾閒時鍾意打獵，欣賞國粹鬥牛之餘，漫畫也屬嗜好之一。佢有冇睇過鳥山明嘅日本漫畫名作《龍珠》，求大俠當然不得而知，但佢喺自然療法技師推薦下，居然創新到喺屋企起咗個「模擬高原卧室」！
聽個名都知唔講得笑，實質概念查實跟《龍珠》內嘅「重力室」差唔多。一間配有空氣調節裝置嘅密室，將空氣含氧量減少至相當於海拔2,000米高度，魯爾幾乎每日喺「模擬高原卧室」中休息8小時。如此這般，「王子」一旦返回「人間」，自然感到身輕如燕，精神飽滿，兼且喺場內場外都毫無「魯」態。
料陸續有球星仿效
求大俠聽人講，就算係美國太空人亦不過每禮拜喺重力室訓練2、3次，如今魯爾日日「操」，梗係「弗」到漏油啦！今季西甲未到12月，「王子」已經射入6球，差1球就平到去季全部嘅聯賽進賬，無傷無病，達標難度唔高。
然而，呢個「模擬高原卧室」俾傳媒爆出之後，睇嚟應該會有唔少球星，為延長自己職業生涯而紛紛仿效；求大俠八卦講多句，場內，「王子」只要繼續保持水平，阿拉干尼斯相信亦無藉口對佢敬而遠之；場外，充滿精力嘅「王子」亦不過係30歲，喺澳門賭王嘅先例之下，「王子」後裔應該陸續有嚟！