韓國女子組合BabyVOXRe.V前成員韓愛莉，因為貪靚走去做臉部削骨手術，結果嚴重出血兼兩度入院，消息嚇窒唔少愛美一族。身為女主角嘅韓愛莉仲因此成為當地多個入門網站嘅搜尋榜No.1，阿Deep都唔知戥唔戥佢高興好。
Fans祝早日康復
好多網友知道消息後，都上佢個blog度留言鼓勵，單係過去兩日就有近10萬瀏覽人次，非常犀利。不過阿Deep發現韓愛莉嘅文章好似口不對心，好似佢喺個人簡介度，就寫上「我希望可以安靜咁過日子，我就係我，要活得開心。」如果佢真係咁樂天知命，就唔應該做完隆胸手術，即刻又去做好危險嘅削骨手術啦。
唔少網友都話韓愛莉本身都好靚，根本唔應該冒險去整容，但既然已經做咗，惟有希望佢早日康復啦！另外，韓愛莉喺月初休養期間，上載咗幾張離隊前嘅舊照，仲強調同前隊友友誼永固。講開又講，部份自拍照佢都刻意遮住下巴，睇嚟佢一早就好唔滿意自己嘅下顎，但阿Deep就覺得唔係好唔見得人啫。
網址： http://www.cyworld.com/babyrev
版主：網盜王尊尼Deep
本欄逢周一至五刊出