瘦田冇人耕，耕開就有人爭。有隻叫陽光紙業嘅新股，話自己係產能最大白面牛卡紙生產商，搞到以前好少提有做白面牛卡紙嘅行業一哥玖龍紙業（2689）即刻出嚟澄清，話自己先係最大。噚日二佬理文造紙（2314）亦發功，寸到話：「唔知陽光係乜水！」
話說理文行政總裁李文俊（圖），噚日喺業績記者會度講，因為陽光個size實在太細，若果佢唔係上市，真係唔知原來有間咁嘅造紙公司喎！佢仲特登用咗幾分鐘，話理文喺9月開始生產白面牛卡紙，總年產能達30萬噸，佢先至喺全國最大！
大佬同二佬咁唱法，相信𠵱家最頭痕嗰個一定係陽光，都唔知點樣同啲投資者拆掂佢。華華建議，不如大家搵個機會，閂埋門坐低慢慢傾，講掂到底邊個係最大先啦！