股壇長毛DavidWebb不時有新發現，而佢嘅新發現一出，每每有人或企業遭殃。噚日佢喺自家網站《Webb-site》發表咗篇文章，對玩具大王蔡志明嘅學歷有質疑，佢竟然走去查家宅咁，查對方讀過嘅大學係乜東東。
蔡志明未有回應
雖然蔡志明間旭日國際唔係上市公司，但要搵蔡博士嘅履歷一啲都唔難，因為佢嘅係阿女蔡加怡間康健國際（8138）嘅非執行董事兼副主席，華華喺康健嘅年報度睇到，蔡博士持有美國NewportUniversity工商管理碩士學位，以及英國SussexCollegeofTechnology工商管理學士學位。而阿Webb就將對兩間英美大學起底後嘅結果，發表出嚟。
嚟自英國嘅阿Webb話，SussexCollegeofTechnology並非英國認可嘅學院，雖然英國有間被認可嘅SussexUniversity，但其實兩者只係同名而冇聯繫，SussexCollegeofTechnology就好似間「one-mancompany」咁，登記嘅地址要同其他公司一齊用。
至於美國NewportUniversity呢？阿Webb話，喺美國兩間教育認可機構USDE同CHEA登記咗嘅大學名單上，都搵唔到呢間大學，成個美國只喺加州搵到一間NewportUniversity，對方自稱得BureauofPrivatePostsecondaryandVocationalEducation認可，但阿Webb住話：「呢個部門已經喺今年7.1摺埋。」
唉，玩具大王年屆61歲先俾人大起底，係咪應該有啲回應呢？可惜，華華搵過康健公關大員幫手，喺截稿前都未聯絡到蔡博士。
呢半年運氣轉差
玩具大王蔡志明係旭日國際主席，亦係上市公司富豪酒店（078）嘅副主席。佢喺《福布斯》全球富豪排行榜排第891位，身家高達80億港銀。佢啱啱減持咗富豪酒店嘅股權至4.74%。
蔡博士除咗搞玩具生意叻，投資物業亦有一手，由今年初至8月，佢就放咗手頭上5個物業，套現30億元，獲利1倍，袋咗15億銀。蔡博士唔止識搵錢，亦好識享受，其中一個最大嗜好莫如揸靚車，佢擁有30幾部過百萬靚跑車，好似法拉利、林寶堅尼同幽靈之子等，恨死唔少人。
不過，玩具大王呢半年就有啲運滯，除咗俾DavidWebb質疑學歷外，住緊嘅九肚山大宅，早排俾人投訴話僭建有蓋車房及雀籠，美國近幾個月又不斷回收中國有問題玩具，佢嘅貴寶號旭日亦被「擺上枱」。
大女蔡加敏下月婚宴
蔡志明俾人質疑學歷，華華諗最激氣嘅可能唔係玩具大王本人，而係佢嘅仔女。因為好多人都知，佢哋一家人好親厚，尤其父女感情好好，所以兩個女加敏加怡一定撐老竇囉。
不過玩具大王呢排都未必得閒理其他嘢，因為佢大女蔡加敏，下個月尾就會同東華三院前主席馬鴻銘拉埋天窗，擺168圍酒席大宴親朋，咁盛大嘅婚禮，睇怕都好多嘢要搞，兩父女分分鐘連勁鍾意嘅鍊車都冇時間玩，仲邊有時間理股壇長毛。
三女蔡加怡，雖然冇繼承老竇嘅愛車嗜好，但就好似老竇一樣精於投資，兩年前殺入股壇，發展香港體檢（397）同康健國際，幫老竇發展醫療王國，佢話事嘅康健國際，家陣市值去到23億，蔡加怡仲係香港最年輕嘅上市公司主席㖭。
電郵：mailto:[email protected]
