恒興業集團大股東趙善簪和「慈善天后」趙曾學韞的幼女趙汝囗，上周出閣嫁予任建築師的韋優文（Ewen），在淺水灣酒店舉行的註冊儀式上，趙太開心落淚，趙善簪挽着女兒進場時，更興奮得如得獎般不斷揮手。
青梅竹馬
趙太昨日在電話中，仍難掩喜悅說：「佢爹哋係好開心，因為Ewen好有誠意，未同囡囡求婚前，先由紐約嚟香港，得到趙生應承先求婚。𠵱家Ewen因為囡囡，會由紐約搬返香港生活，我哋嫁女，但仲多咗個仔。」她透露夫婦二人最疼錫細女，她說：「當年我諗住生兩個仔就算，後來上天賜咗佢畀我哋，係一個驚喜，佢同哥哥差七、八年，孻女孻心肝。」趙太又指趙汝囗與女婿是青梅竹馬中學同學，之後各自在外地升學，後來在紐約重遇，親家老爺同樣是建築師，親家奶奶則是港大退休教師。
採訪：DebbieLum