生日咁大件事，有人「萬千星輝賀台慶」，海油服務（2883）就揀咗個更有意義嘅方式，慶祝喺香港上市5周年。佢哋捐咗800萬人仔，畀「希望工程」喺雲南同海南等地興建「海洋石油COSL希望小學」，扶助當地教育。
你咁有心，自然有人識做幫你搞得好好睇睇，所以捐贈儀式喺人民大會堂舉行。其實海油服務一直對社會公益不遺餘力，佢嘅前身──中海石油技術服務公司，已經喺河北捐建兩幢希望小學。05年，海油服務亦喺中國石油大學（華東）、集美大學同重慶科技學院等高校，設立獎學金，幫助品學兼優嘅貧苦學生。
海油服務首席執行官兼總裁袁光宇話，作為國有企業，未來會積極參加社會公益事業，回饋社會。唔知係咪做得善事多，海油服務噚日個股價都醒神個人，升咗3.4%，佢阿媽中海油（883）更錄得5.9%嘅升幅。