葡萄牙爛路狂踩<br>全新波子GTS

葡萄牙爛路狂踩
全新波子GTS

從來未想過試車要山長水遠、長途跋涉飛越大半個地球，走到南歐嘅葡萄牙法羅（Faro）去。呢次試駕車款係Porsche最新嘅CayenneGTS，這部火爆SUV早前已經喺法蘭克福車展中亮過相，今趟就真係有機會開車實戰。坦白講，當抵達Faro諗住可以即時見到CayenneGTS，但可惜緣慳一面，要到旅程第3日才正式跟它到處去，實行來一次上山下海跑爛路，感覺確實爽得很！

記者、攝影：梁美甜
鳴謝：PorscheCentreHongKong（29262911）

日踩300公里

試駕之旅由酒店出發，繞住葡萄牙南部高原及沿海走一轉，由早上10時踩到傍晚6時左右返回酒店，8個鐘頭大約踩咗300公里，當中包括高速公路、蜿蜒山路、狹窄鄉郊小路等等，循唔同路段對CayenneGTS作全面性能測試。今次試駕者包括整個亞太地區傳媒，車隊陣容有幾鼎盛，所經之處也引來不少途人對我們行注目禮。

■試駕路段各有不同，沙塵滾滾反而唔係成日有。

■喺沙灘見一部車俾沙「食」住，都係靠CayenneGTS拉番出嚟咋！

高性能運動型SUV

CayenneGTS定位在CayenneS和CayenneTurbo之間，大家第一眼都會覺得佢係一部豪華多功能運動型SUV，其實CayenneGTS擁有四驅功能的同時，也擁有跑車性能，同時亦具備房車嘅舒適性。CayenneGTS係Porsche首款車同時配備彈簧懸掛和Porsche主動懸掛管理系統（PASM），加上屬Option嘅Porsche動態底盤控制（PDCC），大大提高CayenneGTS嘅防傾側能力同轉彎時嘅靈活性，疾走蜿蜒山路游刃有餘。新車更配備PTM恒時四驅系統，加上4.8公升V8偈，最大馬力輸出達405匹，由靜止起步加速至100km/hr都只係6.5秒。波檔與波檔之間嘅齒輪比更密，從而令表現變得更運動化。加上可變成手動操作，足能讓你過足手癮！

■CayenneGTS外觀與Turbo版相若，惟輪拱及頭燈稍有不同。

■4.8公升自然吸氣引擎的最大賣點，還可輸出達500Nm的扭力。

■按吓Sport掣就可以調節Engine同波箱設定，反應即時變得Sporty。

初段多彎劈到暈

試駕初段，係一條又直又長嘅高速公路，輕輕踩油門，CayenneGTS已經好有反應，唔覺意大油啲，車速都過百公里，唔知大家係咪想為新車做WarmUp，部部車都放到起碼180km/hr。坦白講，我覺得軚太輕，稍推一下已令車身轉向，上山時彎多又斜又急都有少少怯，幸好PASM電子系統發揮得好，幾急嘅彎都入到，就算係連續急彎都輕易面對，車身亦只係稍傾，加上21吋大胎軨，大大加強咗入彎嘅穩定性！由於我唔熟左軚駕駛，所以揸起上嚟係就係有少少唔慣，但我依然可以感受得到CayenneGTS嘅高性能表現，而呢份安全感令我更放心去享受駕駛過程，同欣賞到小鎮、農田嘅山光景色，原來駕駛可以咁樣享受。

■外國試駕最妙嘅就係景色開揚，山光水色一流。

■試駕者來自亞太區唔同嘅國家同地區，超熱鬧。

■最享受係行經小鎮嘅路段，感覺認真Free。

獨立後座Fit大隻佬

CayenneGTS絕對係豪華車，外觀上沿用咗CayenneTurbo嘅設計風格，車頭配有多個大型入風口和LED條形頭燈。內櫳儀錶板、中控台嘅飾板亦用上鋁飾，營造出Porsche獨特嘅運動感。全新開發的12向電動調校座椅，真皮內裝加上局部採用Alcantara高級麖皮配搭，強烈展示出CayenneGTS嘅運動化，加上車廂空間大，後排3座位更闊落到連3個大隻佬都坐得落。