《Beowulf》（魔戰王：貝奧武夫），中英文戲名均蹺口，友人提議去睇，噏咗一輪唔知噏乜，結果簡單地話不如睇聽講安祖蓮娜祖莉冇着衫嗰齣戲。
順便試新嘢，繼IFC、AMC太古廣場及數碼港後，Elements的TheGrandCinema是另一間有品靚戲院，有品的意思不止是硬件設施，新開張當然聲畫與座椅都是頂級的，有品也包括了觀眾群，懂得尊重電影也尊重自己，不會在戲院內傾電話或跟朋友高談闊論劇情。
RobertZemeckis是出色大導演，曾執導《回到未來》及《阿甘正傳》，非常懂得講故事，但後來除了《CastAway》，其餘的作品大部份都神神鬼鬼怪怪卡卡通通，一味玩科技多過講劇情，浪費了咁叻講故事的能力。
《魔》片類似《戰狼300》，也是將畫面調校得像油畫般，總之演員們全部眼定定，好似卡通片中畫出嚟一樣。安祖蓮娜果然有裸體出現，但也像卡通片，普遍電腦迷在家中隨時可以合成出同樣效果，冇難度。
看的是立體版，本來以為像《HarryPotter》般只有幾分鐘，怎知原來全片立體，登時想鬆人，因為睇立體電影非常用神，睇得好攰，對上一次除了在廸士尼樂園便已經是廿幾年前的《立體淫娃》。果然頭十分鐘已經睇得暈頭轉向，本想離場，但十分鐘後黑暗之戰結束，才睇得冇咁辛苦，加上安祖蓮娜又未出場，惟有撐下去。一睇便睇到散場，《Beowulf》採用的相信是目前最尖端的立體拍攝技術，已超越了純粹電影，成為一種新的觀影感受，加上GrandCinema張椅配備重低音震盪效果，一路睇打交戲一路震，都算幾好玩。