噚日美聯集團（1200）老闆黃建業牛一，美聯唔只一眾高層同佢開生日會慶祝，集團股價噚日亦升9%贈興，收報9.84銀，喺升幅榜排18，好意頭。黃建業仲一早買咗份生日禮物賀自己牛一，佢日前用咗兩億銀，買入銅鑼灣蘭芳道1號地舖，同埋1至2樓及5樓商舖。作為香港兩大地產代理之一，黃老闆要買嘢，一班手足梗搵個好盤孝敬，睇怕黃老闆買入呢幾個舖嘅投資回報應該好吸引。
話美聯一班手足識做，華華唔係亂吹，噚日美聯就出咗個關連交易通告，話老闆娘黃太鄧美梨最近賣咗一個住宅物業，由美聯負責，老闆娘賣樓當然要畀佣金，不過，做細嘅梗識做，打番個折畀老闆娘天公地道，打幾多折？100%。即係點？個地產代理白做囉！
黃建業套股買樓
至於黃太賣咗個乜嘢物業？華華就唔清楚。不過賣咗個物業之後，黃太今個月初，買咗個由太古（019）及中華汽車（026）合作發展嘅北角港濤軒，呢個盤開售時已經有唔少人認購，而黃太用咗600幾萬買咗個高層單位，不過呢個一手盤買番嚟就免佣嘅。
其實07年以嚟，黃建業已經開始佢嘅套股買樓大行動，密密買入唔少靚舖，單係今個月，佢就大手掃咗4個商廈（見表），其中尖沙嘴南洋中心2座7樓全層，買入一個禮拜左右，就以9598萬銀摩出，賺咗873萬。
黃氏入呢批貨嘅資金來源，市場一般認為係佢喺10月初配售美聯股份套現得嚟嘅，話說呢年嚟港股係咁升，唔知係咪怕風高浪急，黃建業喺10月初見美聯比年初升咗唔少，即以7.85元配售8.76%美聯股份，套現5億銀，跟住有路邊消息話，佢攞咗4億銀投資多項物業，包括用1.36億買咗上環信德中心高層，實行套股換樓。
黃建業今年部份套股換樓行動
月份：11月
物業：銅鑼灣蘭芳道1號地舖、1、2及5樓
購入（元）：2.00億 售出（元）：持有
物業：尖沙嘴南洋中心2座7樓全層#
購入（元）：0.87億 售出（元）：0.96億
物業：尖沙嘴新港中心602至04室
購入（元）：0.46億 售出（元）：持有
物業：上環信德中心東翼3101,3108至18室
購入（元）：1.36億 售出（元）：持有
月份：10月
物業：金鐘力寶中心2座1115室
購入（元）：0.19億 售出（元）：持有
月份：3月
物業：尖沙嘴廣東道82至84號流尚店全幢
購入（元）：1.80億 售出（元）：3.10億
#摩出轉手賺873萬或10%
作風估佢唔到
家陣香港地產代理行業，幾乎由中原同美聯兩大行壟斷，黃建業有今時今日嘅成績，同佢做嘢有自己一套不無關係，好似04年發盈警，或者02年「幫」中原懸紅緝兇咁，都令人印象深刻。
話說04年美聯喺派中期業績前發盈警，話係因為發展商計劃削減一手樓代理佣金，呢個消息見報當日，黃建業就沽出咗4700幾萬股美聯，套現咗億幾銀，點知到咗真係派成績表，純利不跌反升，錄得4.5倍增長，賺1.66億銀，仲係之前7年以嚟最高紀錄一次。黃老闆當時解釋，因為二手樓成交增加所致。
至於02年，佢哋嘅競爭對手中原地產，有13間分行俾人接連扑爛玻璃刑毀，當時中原主席施永青話地產代理競爭白熱化，容易引起同行妒忌，過兩日，黃建業就帶埋幾個美聯高層出嚟，話懸紅廿萬銀為對方緝兇，又喺多份報紙登全版聲明話關注事件。你話黃老闆嘅作風係咪好難捉到路吖。
電郵：mailto:[email protected]
