21/11/07
晴天
最新動態
近期港股欠缺大方向，成交量萎縮，大家期待嘅港股直通車，仲煲緊「冇米粥」，連香港股神四叔亦都叫股民小心行事，同早幾月牛氣沖天差好遠。
講真今晚國際賽又同樣欠缺大方向，香港大部份球迷至愛嘅英格蘭，和波就出線，捧主W有顧忌；要爭出線又孭得飛嘅葡萄牙、瑞典，又讓得太狠，荷蘭、法國同意大利直情可以打風流波，可以預期馬會今晚「成交量」亦唔慌多；球迷既然冇心水，就千祈唔好焗賭，留番注碼周六日賭英超，信心大得多。
最近英超比較多香港人關心嘅新聞，就係原任伯明翰領隊布魯士，過檔去韋根，據聞伯明翰仲收到300萬鎊「分手費」，對一支中下游球隊嚟講，300萬鎊都夠買個唔差嘅球員。當然有得就有失，布魯士雖然未至於一級領隊，不過佢係傳統英式領隊，至少激勵到球員拼搏，伯明翰想搵前熱刺領隊祖爾出山，又被祖爾拒絕；而且「卡臣楊」全面收購伯明翰一事，又拖拖拉拉，球會同球員似乎欠缺大方向，周六主場對樸茨茅夫，都唔值得睇好。
牽牛
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報