港股噚日一開市就裂口低開，一度急跌過千點，但晏晝開市迅速反彈，全日倒升311點。可能散戶近期都見慣呢啲起跌，所以網上討論區嘅散戶網友，好多用「小奇迹日」形容噚日嘅市況。
Ghini888話：「噚日港股簡直係奇迹，美國跌得咁甘，香港都可以企得穩。」Sammysiuyi亦話：「直頭係8月17號翻版。」當日港股亦出現「大DeepV」。
Hk9394呻：「先打好友，再打淡友。」Tom2618認為係，「想殺晒啲牛熊證，好友淡友一概通殺。」
Casaba亦話，「真係估佢唔到，仲諗住晏晝會再跌多啲，點不知嚟過咁急嘅反彈。」Cmc8106講：「係完全估唔到升定跌，如果日日都係咁，就好得人驚。」
Tomastim話：「都唔知係咩人，可以喺咁短時間買咁多貨，將恒指抽高成700幾點，係咪阿爺出手托住個市？唔想佢跌破27000點。」Ktclk2005估：「可能係四叔都唔定。」
但就算個市升番，Chiling2都冇諗住咁快入市：「家陣係引人落叠，睇嚟仲有排跌，唔好咁易中招追貨。」