噚日係無綫40周年台慶，一眾小生花旦盛裝出席，各自鬥靚鬥行頭。結果由今期最佳女主角大契李司棋勝出，戴上總值超過2,200萬嘅紅寶鑽石飾物上陣，貴盡全場，不過佢同細契關菊英被助導帶領出場時，竟然有人仲喺台前表演噴火，阮兆祥即刻護花，邊嗌「走呀」邊拖大契閃開，認真狼狽。
嘟嘟失色
細契都唔嘢少，戴總值1,860萬嘅珠寶出場；相比下每年贏行頭嘅姐級司儀鄭裕玲(嘟嘟)就失色少少，先後配戴兩套合共1,300萬嘅鑽飾，但會着上兩套分別價值60,000蚊同40,000蚊嘅DorianHo晚裝。原來嘟嘟並唔知道噚日係咪六叔生日，佢話：「我淨係知佢今年100歲，祝佢身體健康，福如東海、壽比南山。」另一司儀葉翠翠唔夠嘟嘟「貴」，戴兩套總值過400萬嘅鑽飾，配襯兩套CeciliaYau嘅性感晚裝上陣，但款式deepv兼露背，相當養眼。
廖碧兒身穿Gucci中空晚裝同配戴總值400萬嘅Bvlgari首飾，對於喺頒獎禮上捧蛋，仲被陳法拉寸佢唔係資深就攞獎，碧兒話呢啲新聞係娛樂大家，頒獎禮都已成過去，但佢亦自嘆冇攞獎運。
至於其他藝員亦各穿名牌戰衣，黎姿着Versace白色晚裝，汪明荃着ColletteDinnigan藍色雪紡裙，陳敏之着ColletteDinnigan水晶晚裝，徐子珊同湯盈盈就齊着ChristianLacroix；其中又以子珊、楊思琦、李亞南等最性感。
