讀者關先生噚日推介玖龍紙業（2689），建議16蚊買入，可以長揸，目標價睇25蚊。玖紙噚日收市報19.9蚊，下跌2.7%，最低曾見18蚊。玖紙嘅股價由9月中26.25蚊高位係咁跌，累積跌24%。
「唔長揸賺唔到錢」
對於玖紙嘅投資策略，關先生話：「唔長揸賺唔到錢」，雖然關生多次強調，股票要長揸，但佢自己就並冇實行，「自己冇長揸港交所（388），已經係一個好大嘅教訓，喺59蚊買入港交所，70蚊放咗，諗住賺咗10蚊，係人都放啦，點估到佢後尾升得咁犀利，賺少幾倍。」
跌穿18元入多注
至於對玖紙信心十足，全因明星效應，佢話：「主席張茵話晒都曾經係中國首富，加上公司業績又靚過理文造紙（2314），對佢梗有信心，如果股價跌穿18蚊，仲會再入多一注！」
不過，對於關生嘅心水，黃敏碩提醒：「玖紙近排走勢弱咗，因為市場擔心可能會有配股集資，所以股價表現會比另一隻紙業股理文造紙較波動。」噚日玖紙嘅股價跌穿咗20蚊嘅支持位，嚟緊有機會增加沽售壓力。
民企無注資概念
黃敏碩更話：「玖紙屬於內地民企，唔會好似國企同紅籌咁，有注資概念，欠缺咗資金推動因素，所以就算後市好轉，玖紙亦未必會即時反彈。」
但畢竟玖紙係大陸紙業股龍頭，業務發展亦唔太受國策影響，所以黃敏碩都叫投資者唔使太擔心。
東亞銀行（023）
中銀入股動機存疑
因為中銀香港（2388）入股近5%，股價近兩日急升的東亞銀行（023），沙田友Patrick噚日亦推介此股，但表示尚未入貨。佢話：「噚日已經升咗兩個幾，想睇吓嚟緊有冇機會再上。」
孫柏文話，前一日已有讀者同佢哋講，今個禮拜一開市早段，東亞有高達7750萬股大手上板，每股作價51元，當時市場已傳出東亞被收購嘅傳聞，建議大家照跟入市買東亞。若果Patrick睇節目，噚日入市已有斬獲。他又表示，東亞本身無單一大股東，理論上收購困難度不高。
唔係全面收購
不過，黃敏碩亦提醒Patrick，對有關消息不要過份欣喜，「始終唔係全面收購，只係買咗5%。」睇番啲大行報告，看法亦較為中性。當然，大家對中銀香港背後動機亦有猜疑，因為中銀香港母公司就係中國銀行（3988），喺咪需要咁樣曲線投資東亞呢？
黃敏碩認為，中銀香港入股東亞有兩個好處，首先可避免直接競爭，因為中銀香港現時好多錢，某程度上亦不會投資次按，現時投資喺呢個項目上，效益會較大。
況且，投資東亞，中銀亦可以鞏固喺香港市場嘅實力。
建設銀行（939）
還是覺得佢最好
舊年才踏足股市嘅關太，推介建設銀行（939），原因係：「對大陸經濟好有信心，咁多隻大陸銀行股，佢最好！」唔好以為師奶齋噏，關太雖然股齡淺，但除咗建行，曾經炒過嘅中資銀行包括交行、工行，「我連中行都有買過，但始終覺得建行最好。」
關太建議嘅買入價係7.3蚊，至於佢自己就喺7.8蚊時買入，諗住到7.3蚊時再加多注，目標睇9蚊。不過，關太好感慨話，「真係要長線投資，如果走出走入賺嘅錢唔多。」咁感慨原因係佢自己曾經錯失賺更多嘅機會：「我自己第一隻買嘅股票都係建行，當時好平，只係3.6蚊，但嗰一注賺咗少少就放。」
黃敏碩話：「呢隻股甚至瞓醒，或者遊完埠返嚟再睇，都唔使擔心。」
買入價
關太建議：$7.80 專家回應：$7-7.3分段吸
目標價
關太建議：$9 專家回應：—
止蝕價
關太建議：無 專家回應：$6.50
時間
關太建議：長揸 專家回應：—
工商銀行（1398）
放長線6蚊密密吸
將軍澳Avy推介工商銀行（1398），9月尾10月初，佢喺6蚊水位入咗貨，買入原因係睇好中資銀行股，諗住長揸。孫柏文問：「先排工行跑上七個幾時，你有冇心郁郁想套現？」Avy答：「都冇㗎，諗住擺三五年嘛！」
倡平均成本法入市
Avy仲想喺6蚊左右繼續收集，黃敏碩建議：「可以分段買，因為工行雖然冇建行跑得咁快，但佢就穩步咁上，工行本身亦有業務優勢。」雖然有買賣策略，但Avy就唔識得定止蝕位，黃敏碩教路：「其實可以用一個平均成本法入市，每半年review一次。如果工行業務係穩步增長，唔需要定一個止蝕價。」孫柏文亦認為，如果基本因素唔變，止蝕價並唔重要，反而要留意工行業務發展先至係上策。
買入價
Avy建議：$6 專家回應：平均成本法收集
目標價
Avy建議：$12 專家回應：—
止蝕價
Avy建議：$5 專家回應：—
時間
Avy建議：長揸 專家回應：—
恒指法興call輪（7970）
限提係自由行先兆
將軍澳Michael有信心恒指農曆新年後可以冲冲喜，好快見33000點，所以推薦恒指法興call輪7970，但又心大心細，唔知信四叔叫𠵱家忍手好，定跟陸東睇恒指去到32000點好？黃敏碩就唔係完全buy晒陸東嘅指路明燈，「佢對地產嘅睇法睇得太前太快。」Michael就認為殊途同歸，既然兩個都睇好出年恒指，仲使乜驚？
不過，孫柏文提醒話好多國家政策都會左右港股，溫總嗌停直通車，又堵截地下水，但Michael自有一套見解，「溫總唔贊成深圳銀行限提，既然截唔到地下水，不如光明正大放水，官方check住；限提相信係資金自由行先兆。」
另外，港股噚日又嚟「小奇迹」，全因魚缸將「美國提早減息」嘅大喜訊傳到言之鑿鑿；空穴來風唔通真係有因？Michael話一於信咗先，減唔減？拭目以待。
目標價
Michael建議：恒指33000點 專家回應：—
時間
Michael建議：農曆新年後 專家回應：視乎美減息及資金自由行情況再決定
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
＊以webcam參與節目者，可額外獲贈KFC$100現金券
歡迎Phonein28698262
http://appleactionews.com/features/finance/
